Qazaqstan azamattarynyń menshiginde 490-nan astam ıahta bar.
Mundaı derekti Senat depýtaty Bekbolat Orynbekov keltirdi, dep habarlaıdy Almaty-akshamy.kz.
Senatordyń aıtýynsha, sán-saltanat salyǵy máselesi jańa Salyq kodeksinde 3 baǵyt boıynsha baılanysqan.
«Onyń birinshisi – jyljymaıtyn múlik. Jańa ǵana aıtqanymdaı, shamamen elimizdiń 3,8 mln turǵynynda 6,8 mln jyljymaıtyn múlik nysany bar. Ekinshi másele – «sán-saltanat» máselesi. Kólik boıynsha aıtsaq, quny 50 mln teńgeden asatyn kólikterge progresıvti shkala belgilenýi múmkin. Bizde Qazaqstan Respýblıkasy azamattarynyń menshiginde dep sanalatyn 490-nan astam ıahta bar. Úshinshi baǵyt araq-sharap ónimderimen baılanysty», - dedi senator.
Ulttyq ekonomıka vıse-mınıstri Azamat Ámrınniń dereginshe, elimizde jeke ıahtasy men ushaǵy bar adamdar bar-joǵy 13 myń teńge salyq tóleıdi.
«Bizde menshiginde ushaqtar men ıahtalary bar salyq tóleýshiler bar. Olardyń salyǵyn da qarap jatyrmyz. Bylaısha qarasaq, bir nysan úshin tólengen soma shamamen 13 myń teńge ǵana. Bul jerde, árıne, birneshe ese kóterý kerek. Ahýaldy túzeý kerek. Iaǵnı, ıahtalar men ushaqtardyń kólik salyǵyn ulǵaıtamyz», - dedi mınıstrdiń orynbasary.