Almaty qalasynda «Samuryq-Qazyna» qoldaýymen 2,3 mlrd teńgege 20-ǵa jýyq áleýmettik joba iske asyrylýda.
Almatyda «Samuryq-Qazyna» AQ kompanıalar tobynyń biryńǵaı qaıyrymdylyq operatory - «Samruk-Kazyna Trust» qorynyń qyzmeti tanystyryldy. «Almaty-Arena» kópsalaly sport keshenine jınalǵan BAQ qyzmetkerleri men qoǵam belsendileri erekshe balalarmen birge kóńildi estafetaǵa qatysty.
Sharada «Samruk-Kazyna Trust» áleýmettik jobalardy damytý qory arqyly qarjylaı qoldaý tapqan birqatar qaıyrymdylyq jobalarynyń tárbıelenýshileri men olardyń ata-analary bas qosty.
«Balalyq shaq – bir ret ǵana bolatyn, qaıta oralmaıtyn, saǵyna eske alatyn ǵajaıyp álem ispettes. Osy oraıda, birneshe jyl boıy «Samruk-Kazyna Trust» áleýmettik jobalardy damytý qory balalardyń senimdi serigine aınalǵanyn aıtqym keledi. Búgin birneshe jobada qamtylǵan jetkinshektermen kezdesip otyrsyzdar. Bolashaqta basqa óńirlerde de osyndaı sharalardy uıymdastyrý josparda bar», - dep atap ótti sharanyń ashylý rásiminde «Samruk-Kazyna Trust» qorynyń bas dırektory Alfıa Adıeva.
Mysaly, «Salamatty bolashaq» jobasy 2018 jyldan bastap kompanıalar toby atynan qarjylandyrylyp keledi. Joba aıasynda elimizdiń 21 qalasy men eldi mekeninde tegin ınklúzıvti jáne beıimdelgen sport seksıalarynyń jelisi qurylyp, 1 100 ereksheligi bar bala sporttyń 12 túrine qatysý múmkindigine ıe boldy.
Jaqynda ǵana Qordyń Qamqorshylyq keńesi maquldaǵan «All ability Camp» sporttyq lageri» jobasynda basqa óskeleń urpaq ókilderimen qatar, «Samuryq-Qazyna» quramyndaǵy kásiporyn qyzmetkerleriniń erekshe balalarynyń jazǵy demalysyn uıymdastyrý josparlanǵan.
Sırek kezdesetin syrqatqa shaldyqqan balalarǵa kómek berýge baǵyttalǵan «Balalarǵa ómir syıla», ata-anasynyń qamqorlyǵynsyz qalǵan balalarǵa zańgerlik qoldaý kórsetýge arnalǵan «Jetimi joq Qazaqstan» jáne aýtızm dertine dýshar bolǵan januıalarǵa járdem berýdi maqsat tutqan «Aýtızmdi jeńemiz» ońaltý ortalyqtary sıaqty jobalar da ońtústik shaharda júzege asýda.
«Daýn sındromy bar balalarǵa arnalǵan ortalyq ashý jáne jaraqtandyrý, Daýn sındromy bar balalar men jasóspirimderdi qoǵamǵa áleýmettik beıimdeý men yqpaldastyrýǵa járdemdesý» jobasy aıasynda Almatydaǵy ortalyq pedagogtarynyń shtaty keńeıtilip, shetelden bilikti mamandar shaqyrý jáne Daýn sındromy bar adamdardy jumyspen qamtý kózdelýde.
Sharaǵa qatysqan ÚEU ókilderi ózderiniń jobalary týraly áńgimelep, «Samuryq-Qazyna» kompanıalar tobynyń kórsetken qoldaýyna alǵys aıtty.
2016-2023 jyldar aralyǵy «Samruk-Kazyna Trust» qaıyrymdylyq qyzmeti aıasynda megapolıste densaýlyq saqtaý men bilim, halyqtyń áleýmettik osal toptaryn qoldaý men buqaralyq sportty damytý jáne áleýmettik kásipkerlik baǵyttarynda jalpy somasy 2,3 mlrd teńgege 19 jobaǵa júzege asyp otyr.