Reseı aýmaǵynda qazaqstandyq azamattardyń qatysýymen bolǵan JKO týraly habardan keıin oqıǵa ornyna shuǵyl túrde 6 jedel járdem brıgadasy jolǵa shyqqan, dep habarlaıdy aqshamnews.kz
Densaýlyq saqtaý mınıstrliginiń málimetinshe, jol apaty «Samara — Bolshaıa Chernıgovka» tas jolynda (RF Samara oblysy) bolǵan. Kólik apatynan Qazaqstannyń alty azamaty, onyń ishinde eki bala zardap shekken. Olar 6 sanıtarıalyq avtokóliktiń kómegimen Oral medısınalyq mekemelerine jetkizildi. Taǵy bir zardap shekken qazaqstandyqty TJ departamentiniń brıgadasy jetkizdi.
— Apattan zardap shekkenderde mıdyń shaıqalýy, aıaq-qoldardyń, jambas súıekteriniń, omyrtqanyń synýy, kógerý, gematoma jáne ortasha aýyrlyq dárejesindegi kóptegen jaraqattar tirkeldi. Búgin tańerteń zardap shekken 5 eresek adam Oral qalalyq kópbeıindi aýrýhanasyna, 2 bala oblystyq kópbeıindi balalar aýrýhanasyna emdeýge jatqyzyldy, onda olarǵa medısınalyq kómektiń tolyq kólemi kórsetiledi. Brıgadalardyń tasymaldaýy barysynda pasıentterdiń jaı-kúıiniń nasharlaýyna jol berilgen joq, — delingen mınıstrlik habarlamasynda.