QR Oqý-aǵartý mınıstrliginiń Respýblıkalyq ǵylymı-praktıkalyq bilim mazmunyn saraptaý ortalyǵy kelesi oqý jylynda qoldanylatyn oqýlyqtar men oqý-ádistemelik keshenderdi saraptamadan ótkizdi, dep habarlaıdy aqshamnews.kz Oqý-aǵartý mınıstrligine silteme jasap.
Saraptamada 278 oqýlyq pen oqý-ádistemelik qural qaraldy, onyń 266-sy maquldanyp, paıdalanýǵa usynyldy. Sondaı-aq, erekshe bilim berý qajettilikteri bar balalarǵa arnalǵan Braıl shrıftimen jáne jazýy úlkeıtilgen oqýlyqtar ázirlendi. 4-synyptar úshin sıfrlyq saýattylyq, orys tili jáne shet tilderi (aǵylshyn, nemis, fransýz), beıneleý óneri, eńbekke baýlý, jaratylystaný pánderi boıynsha oqýlyqtar jáne uıǵyr, ózbek tilderinde oqytatyn mektepterge arnalǵan oqý quraldary bekitildi.
«Pándik saraptama komısıasynda tájirıbeli pedagogter men ǵalymdar jumys istedi. Oqý ádebıetterin baǵalaý ár basylymdy synaqtan ótkizý men taldaý nátıjelerine negizdelip, ǵylymı-pedagogıkalyq talaptarǵa sáıkes júrgizildi. Bekitilgen oqýlyqtar men oqý-ádistemelik keshender bilim berýdiń zamanaýı talaptaryna tolyq sáıkes kelip, oqýshylardyń tabysty oqýyna jáne bolashaqta qajetti mańyzdy daǵdylar men bilimderdi damytýǵa baǵyttalǵan», – dep atap ótti mınıstrliktiń Respýblıkalyq ǵylymı-praktıkalyq bilim mazmunyn saraptaý ortalyǵynyń dırektory Nazıra Ábdirahmanova.
Sondaı-aq aıta ketý kerek, mektepke deıingi bilim berý uıymdaryna arnalǵan oqý-ádistemelik quraldar alǵash ret keshendi saraptamadan ótti. Oqý-ádistemelik keshenge ádistemelik nusqaýlyq, jumys dápteri, oqýlyq, úlestirme jáne demonstrasıalyq materıaldar men álbomdar kiredi.