Olar 1,5 mlrd teńge salyq tólegen.
«Altyn Orda» bazarynda saýda jasaıtyn 2993 azamat kásipker retinde tirkeldi. Bul týraly Memlekettik kirister komıteti málimdedi, dep habarlaıdy Almaty-akshamy.kz QazAqaparatqa silteme jasap.
«Memleket basshysynyń Almaty oblysyndaǵy «Altyn Orda» bazarynyń qyzmetin retke keltirýge qatysty tapsyrmasyna sáıkes birqatar baqylaý sharalary júzege asty. Saýda ortalyǵynda jumys isteıtin 2993 azamat kásipker retinde tirkeldi. Onyń ishinde aqpanda - 1371, naýryzda - 1443, sáýirde 179 adam jeke kásipkerlik qujatyn aldy. Burynnan tirkelip, jumys istep otyrǵan jeke kásipkerler men zańdy tulǵalardy qosa eseptesek, qazirgi ýaqytta jalpy sany 3 324 sýbekti bar. Buryn bazar aýmaǵynda saýda jasaıtyn 331 salyq tóleýshi esepte turǵan», - dep jazdy vedomstvodan.
Taǵy belgili bolǵany, baqylaý sharalary bazardy jalǵa alýshy «Altyn Orda QazTrade Ltd» JSHS jáne bazar ıesi «KURYLYS LTD» - «Kýrylys LTD» JSHS-na qatysty júrgizilgen. Qoldanylǵan sharalardyń nátıjesinde búdjetke 1,5 mlrd teńge salyq tólendi, onyń ishinde «Altyn Orda QazTrade Ltd» JSHS 1,4 mlrd teńge salyq tólegen, «KURYLYS LTD» - «Kýrylys LTD» JSHS-i – 92,3 mln.teńge búdjetke aýdarǵan.
«Odan bólek, qoldanylǵan sharanyń nátıjesinde «Altyn Orda QazTrade Ltd» JSHS men «KURYLYS LTD» - «Kýrylys LTD» JSHS-yna kameraldyq baqylaý boıynsha jalpy somasy 1,3 mlrd teńgege habarlamalar qoıylyp, 1,1 mlrd teńge qosymsha salyq esepteldi. Qazirgi ýaqytta onyń 650 mln teńgesi búdjetke óndirildi», - dep tolyqtyrdy komıtetten.
Sonymen qatar, qazirgi ýaqytta «Altyn Orda QazTrade Ltd» JSHS men bazar ıesi «KURYLYS LTD» - «Kýrylys LTD» JSHS-na qatysty salyqtyq tekserýler júrgizilýde.