BJZQ-MEN BİR KÚN
Biryńǵaı jınaqtaýshy zeınetaqy qory (BJZQ) az ýaqyt ishinde-aq halyq seniminen shyǵyp úlgerdi. Oǵan dálel, osy kúnge deıin «salymshylardyń aqshasy joǵalypty nemese basqa da keleńsiz oqıǵalar oryn alypty» degen jaısyz habar taraǵan emes. Qaıta jyldar jyljyǵan saıyn Qor salymshylary úshin barlyq jaǵdaı jasalyp, múmkindikter kókjıegi keńeıýde. Tipti, salymshylar (alýshylar) óz shottarynda qansha aqsha baryn úıinen uzamaı-aq, kez kelgen jerde otyryp udaıy qadaǵalaı alady.
Salymshylardyń qarajatyn shashaý shyǵarmaı ıe bolyp otyrǵan «BJZQ» AQ-nyń Almaty qalasyndaǵy fılıalynyń tynys-tirshiligi qandaı? Osy saýalǵa jaýap izdep, atalǵan mekemeniń tabaldyryǵynan attadyq.
JAŃA KÚN
«BJZQ» AQ-nyń Almaty qalalyq fılıalynda kúndelikti jumys kúni tańerteńgilik lezdemeden bastalady. Fılıal dırektory Nurlan Slámbekuly Ámirenov qyzmetkerlerine árbir tutynýshyǵa sapaly qyzmet kórsetýdi, zeınetaqy zańnamasyna engizilgen ózgeristerdi, jańa qyzmetterdi jan-jaqty túsindirýdi mindetteıdi. Sáıkesinshe, árbir qyzmetker kelýshilerdi jyly shyraımen qarsy alyp, qajetti qyzmetterdi kórsetip, barlyq suraqtaryna jaýap berip, zeınetaqy júıesinde bolyp jatqan ózgeristermen tanystyrady. Iaǵnı fılıal qyzmetkerleriniń ádettegi jumys kúni Qor keńselerinde jáne olardan tys jerde salymshylarǵa (alýshylarǵa) jınaqtaýshy zeınetaqy júıesi aıasynda bilikti jáne sapaly qyzmet kórsetýden bastalady.
Fılıalda 94 qyzmetker jumys isteıdi. Olardyń 72-si jeke jáne zańdy tulǵalarǵa jınaqtaýshy zeınetaqy júıesi máseleleri boıynsha tómendegideı qyzmet túrlerin kórsetedi: Qazaqstan Respýblıkasynyń qoldanystaǵy zańnamasymen jáne Qordyń ishki normatıvtik qujattarymen belgilengen tártipte Qor salymshylarynyń (alýshylarynyń) zeınetaqy tólemderin taǵaıyndaý, zeınetaqy jınaǵyn aýdarý týraly ótinishterin qabyldaý, qalyptastyrý jáne tirkeý; salymshynyń (alýshynyń) jeke zeınetaqy shotynan úzindi kóshirmeler berý; derektemelerine ózgerister (tolyqtyrýlar) engizý; qoldanystaǵy zańnamamen jáne Qordyń ishki qujattarymen belgilengen tártipte habarlandyrý tásilin ózgertý (anyqtaý) týraly kelisimdi rásimdeý; Qor qyzmeti týraly aqparatty usyna otyryp, salymshylarǵa (alýshylarǵa) aqparattyq-túsindirý jumystaryn júrgizý; halyqtyń qarjylyqquqyqtyq saýatyn kóterý maqsatynda aqparattyq - túsindirý jumystaryn uıymdastyrý jáne t.b.
Qor salymshylarynyń óz jınaqtary týraly aqparatty tez alýy úshin de barynsha jaǵdaı jasap keledi. Qazirgi kezde zeınetaqy qorynyń arnaıy saıtyna tirkelgen ár azamat óziniń jınaǵan qory týraly aqparatty kez kelgen jerde jáne qalaǵan ýaqytynda ala alady. Qor saıtyna tirkelip, arnaıy logın men qupıa sóz arqyly óziniń jınaǵy jaıyndaǵy aqparatty bilip otyrady. Qor zeınetaqy jarnasynyń qupıalylyǵyn qatań saqtaıdy. Ár salymshy týraly jeke aqparat «QR zeınetaqymen qamtamasyz etý» týraly Zańymen qorǵalǵan.
Qor salymshylarynyń óz jınaqtary týraly aqparatty tez alýy úshin de barynsha jaǵdaı jasap keledi. Qazirgi kezde zeınetaqy qorynyń arnaıy saıtyna tirkelgen ár azamat óziniń jınaǵan qory týraly aqparatty kez kelgen jerde jáne qalaǵan ýaqytynda ala alady. Qor saıtyna tirkelip, arnaıy logın men qupıa sóz arqyly óziniń jınaǵy jaıyndaǵy aqparatty bilip otyrady. Qor zeınetaqy jarnasynyń qupıalylyǵyn qatań saqtaıdy. Ár salymshy týraly jeke aqparat «QR zeınetaqymen qamtamasyz etý» týraly Zańymen qorǵalǵan.
QYZMETTER QOLJETİMDİ
BJZQ qyzmetteri halyqqa kez kelgen ýaqytta, kez kelgen jerde qoljetimdi bolýy úshin 2021 jyldyń jazynan bastap Qor mamandary Almatydaǵy Dostyq dańǵyly, 85 mekenjaıynda ornalasqan «Áleýmettik qyzmetter úıinde» de Qor salymshylaryna (alýshylaryna) qyzmet kórsete bastady. Onda da zeınetaqy júıesiniń barlyq baǵyty boıynsha tolyqqandy qyzmetter kórsetiledi.
2021 jyldyń 1 maýsymy men bıylǵy jyldyń 1 maýsymǵa deıingi bir jyl ishinde fılıal mamandary «Áleýmettik qyzmetter úıinde» salymshylarǵa (alýshylarǵa) 9664 qyzmet kórsetken. Onyń ishinde zeınetaqy tólemderin taǵaıyndaýǵa 708 ótinish, al jınaǵyn saqtandyrý uıymyna aýdarýǵa 499 ótinish qabyldanǵan. 2368 salymshynyń (alýshynyń) derektemelerine ózgerister engizilse, 4084 salymshyǵa (alýshynyń) jeke zeınetaqy shotynan úzindi kóshirme berilip, 1495 salymshynyń tásilin ózgertý týraly kelisim jasalǵan.
Sondaı-aq, Qordyń Almaty fılıalynyń qyzmetkerleri qaladaǵy Áýezov, Túrksib jáne Almaly aýdandarynyń aýmaǵynda ornalasqan 3 operasıalyq bólimshede, Esik, Qaskeleń, Talǵar, Qonaev qalalaryndaǵy, Ótegen batyr, Uzynaǵash aýyldaryndaǵy salymshylarǵa arnalǵan qyzmet kórsetý ortalyqtarynda derbes qyzmet kórsetip keledi.
Iá, jahandanýdyń aqparattyq kóshinen qalmaı, kúndelikti ómir súrý daǵdymyz da ózgerip, jańaryp jatyr. Soǵan oraı, fılıal ǵımaratynda «Ózine-ózi qyzmet kórsetý» termınaly ornatylǵan. Onyń bolýy jurtshylyqtyń altyn ýaqyttaryn únemdeýge jáne qaǵazbastylyqtan arylýǵa birden-bir taptyrmas qural ekeni aqıqat.
FILIALDAǴY «ASHYQ ESİK» KÚNİ
Halyqtyń zeınetaqy zańnamasy máseleleri boıynsha qarjylyq saýattylyǵyn arttyrý jáne Qor qyzmetterin nasıhattaý maqsatynda BJZQ ár toqsan saıyn «Ashyq esik» kúnin ótkizedi. «Ashyq esik» sharasyna qatysýǵa, ásirese ártúrli oqý oryndarynyń (kolej, ınstıtýt, ýnıversıtet) túlekteri asa yqylas tanytýda.
Koronavırýs indetine baılanysty bul is-shara eki jyldan astam ýaqyttan beri onlaın tártibinde ótkizilip keledi. Onyń ótetini týraly aqparattar aldyn ala uıymdar men mekemelerge taratylyp, buqaralyq aqparat quraldarynda jáne qala, aýdan ákimdikteriniń saıttaryna ornalastyrylady.
Sońǵy «Ashyq esik» kúni 2022 jyldyń 28 maýsymynda «Zeınetaqy aktıvterin basqarý. Zeınetaqy aktıvteri qalaı jáne qaıda ınvestısıalanady?» degen taqyryp sheńberinde ótti. Qazaqstandaǵy jáne álemdik qarjy naryǵyndaǵy ekonomıkalyq ahýaldy eskersek, bul taqyryptyń qazirgi ýaqytta óte ózekti ekenin aıta ketýge bolady. «Ashyq esik» kúnine 461 adam qatysty.
KÓSH BASYNDA – ALMATY
Biz fılıal basshysymen suhbat barysynda «Bıylǵy shekti soma ózgergenge deıin qansha adam baspana máselesin sheship aldy, densaýlyǵyn jaqsartýǵa jumsaǵandary qansha? Basqarýshy kompanıalarǵa senetinder kóp pe? BJZQ boıynsha Almaty qaı baǵytta kósh bastap tur?» degen saýaldarymyzdy kóldeneń tartqan bolatynbyz.
– 2022 jyldyń 1 maýsymyndaǵy jaǵdaı boıynsha 2021 jyldyń qańtarynan beri BJZQ salymshylardyń (alýshylardyń) turǵyn úı jaǵdaıyn jaqsartý úshin jınaqtalǵan zeınetaqy qarajatyn paıdalanýǵa 1 323 432 ótinishin oryndady. Ýákiletti operator-bankterde ashylǵan qazaqstandyqtardyń arnaıy shottaryna BJZQ 3,1 trln teńgeden astam qarjy aýdardy. Birjolǵy zeınetaqy tólemderiniń ortasha somasy – 2,4 mln teńge.
Oryndalǵan ótinishterdiń eń kóbi bizdiń Almaty qalasynyń (17,63%), NurSultan qalasynyń (13,98%) jáne Mańǵystaý oblysynyń (10,36%) turǵyndary tarapynan joldanǵan.
Sonymen qatar, BJZQ emdelýge berilgen 298,0 mlrd teńgege 384 969 ótinishti oryndady. Bul rette alýǵa bolatyn ortasha soma shamamen 0,8 mln teńge. Sondaıaq, salymshylardyń (alýshylardyń) BJZQ-daǵy JZSH-na ýákiletti operatordan («Otbasy banki» turǵyn úı qurylys jınaq banki» AQ) 29,2 mlrd teńge qaıtaryldy, bul qarajat ótinish berýshiniń ótinishi nemese ózge de sebepter boıynsha belgilengen merzimde paıdalanylmaǵan.
2022 jyldyń 1 maýsymyndaǵy jaǵdaı boıynsha, ınvestısıalyq portfeldi basqarýshylarǵa (IPB) 8,7 mlrd teńge aýdarylyp, BJZQ 5870 ótinishti oryndady. Aýdarymnyń ortasha somasy 1,5 mln teńge. Qazirgi ýaqytta BJZQ zeınetaqy aktıvterin senimgerlikpen basqarýǵa qatysty tórt IPB-men («Halyk Global Markets» AQ, «Jusan Invest» AQ, «BCC Invest» AQ, «Sentras Sekúrıtız» AQ) shart jasasty, – deıdi «BJZQ» AQ Almaty qalalyq fılıalynyń dırektory Nurlan Ámirenov.
Taqyrypqa oraı
2022 jyldyń 1 maýsymyna deıingi kórsetkish boıynsha BJZQ salymshylarǵa (alýshylarǵa) 16,5 mln-nan astam qyzmet kórsetti. Onyń ishinde 11,3 mln-nan astam operasıa elektrondyq formatta, 4 mln-nan astamy avtomatty túrde júrgizilgen. Osylaısha qazaqstandyqtar zeınetaqy qyzmetteriniń 93%-yn qashyqtan aldy.
Bıylǵy jarty jyldaǵy jaǵdaı boıynsha zeınet jasyna baılanysty tólemder 42,4 mlrd teńgeni qurady.
Zeınetkerlik jasqa jetýine baılanysty BJZQ-nan keste boıynsha ortasha aılyq tólemniń mólsheri 29 360 teńgeni, al aı saıynǵy tólemniń eń joǵary mólsheri 707 326 teńgeni qurady