QR Indýstrıa jáne ınfraqurylymdyq damý mınıstrligi Zoom jelisinde «Ashyq saǵat alańy» sharasyn uıymdastyryp, áýe tasymaly, turaqty halyqaralyq jańa áýe reısterin ashý men osy oraıda týyndaǵan túrli máseleler talqylandy, dep habarlaıdy Almaty-akshamy.kz mınıstrliktiń baspasóz qyzmetine silteme jasap.
Shara barysynda qalyń kópshilikti tolǵandyrǵan máselelerdiń biri áýe reısteriniń keshigýi jáne áýe kompanıalarynyń jolaýshylar aldyndaǵy jaýapkershilik máselesi boldy.
Bul saýalǵa basqosýda Azamattyq avıasıa komıteti tóraǵasynyń orynbasary Saltanat Tompıeva jaýap berdi.
Ol reısterdi keshiktirgen avıakompanıalar kóp jaǵdaıda jolaýshylarǵa mindetti qyzmetterdi tıisti deńgeıde oryndamaıtynyn alǵa tartty. Sáıkesinshe, olarǵa zańnamaǵa sáıkes shara qoldanylady.
«Árıne, ushýdyń keshigýi nemese aýystyrylýy kóptegen qolaısyzdyqtar týdyrady. Alaıda tehnıkalyq aqaýlar kez kelgen kezde bolýy múmkin. Tasymaldaýshylar jolaýshylardy reıstiń ushýyn eki saǵattan artyq kútý kezinde alkogólsiz sýsyndarmen qamtamasyz etýge mindetti. Al reıstiń ushýyn tórt saǵattan artyq kútken kezde ystyq tamaq berilýi tıis», – dedi Saltanat Tompıeva.
Sondaı-aq ol reısti kúndiz alty saǵat, túnde segiz saǵat kútken kezde jolýshylarǵa tasymaldaýshy usynǵan qonaqúıde turýǵa jáne tasymaldaýshy usynǵan kólikpen áýejaıdan qonaqúıge jáne keri qaıtý qyzmetteri kórsetilýi qajet.
Tasymaldaýshynyń kinásinen reıs keıinge qaldyrylǵan nemese 10 saǵattan astam merzimge kidirtilgen jaǵdaıda, jolaýshynyń qalaýy boıynsha áýe kompanıasy atalǵan qyzmetterdiń barlyǵyn kórsete otyryp, jolaýshyny bılette kórsetilgen mejeli pýnktke deıin jaqyn arada ushatyn reıspen tasymaldaýdy qamtamasyz etýge mindetti.
«Bul qyzmetterdiń barlyǵy jolaýshylarǵa qoldanystaǵy zańnamaǵa sáıkes tegin kórsetiledi. Eger de tasymaldaýshy kompanıa óz mindetin oryndamaǵan jaǵdaıda jolaýshylar Azamattyq avıasıa komıtetine shaǵymdana alady. Biz kelip túsken shaǵymdardy zerdelep, tıisti sheshim qabyldaıtyn bolamyz, – dep atap ótti Azamattyq avıasıa komıteti tóraǵasynyń orynbasary.