Almaty qalasy advokattar alqasynyń advokaty Janna Muhamadı Caltanat Núkenovanyń ólimine qatysty tergeý saraptamasy jaıly oıymen áleýmettik jelide bólisti.
Advokatyń aıtýynsha, Saltanat Núkenovanyń ólimi boıynsha sotqa deıingi tergeýdiń aıaqtalǵany týraly advokattar alqasyna ótken aptanyń sońynda habarlanǵan.
«Qazirgi ýaqytta bizdi is boıynsha júrgizilgen barlyq saraptamalarmen tanystyrdy. Biraq biz qylmystyq istiń materıaldaryn áli tolyq kórgen joqpyz. Meniń mundaı isterde óte úlken tájirıbem bar, men buryn adam ólimine qatysty istermen aınalysqanmyn, biraq sarapshylardyń tujyrymdary meni tań qaldyryp otyr. Men mundaı qatygezdikti, salqynqandylyqty eshqashan kórgen emespin. Qazirgi ýaqytta Saltanattyń týystaryna degen qurmetpen, biz kisi óltirýdiń egjeı-tegjeıi jaıly aıta almaımyz. Taraptar istiń materıaldarymen tanysqannan keıin jáne qorǵaý týraly ótinishterden keıin is sheshim qabyldaý úshin prokýratýraǵa jiberiledi.
Prokýratýra men İİM ókilderi BAQ-qa bul is boıynsha kúdiktiniń aǵasy qamaýǵa alynǵanyn málimdedi.
Men buryn jazǵanymdaı, biz istiń barlyq materıaldarymen áli tanysqan joqpyz, biraq tájirıbege súıene otyryp, kúdiktiniń aǵasyna QR QK 434-baby (Qylmys týraly habarlamaý) boıynsha aıyp taǵylýy tıis.
Baptyń dıspozısıasy: «jasalǵaly jatqan nemese JASALYP BOLǴAN ASA AÝYR QYLMYS týraly habarlamaý - alty myń aılyq eseptik kórsetkishke deıingi mólsherde aıyppul salýǵa ne sol mólsherde túzetý jumystaryna ne alty jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady», - deıdi advokat.
J.Muhamadıdiń sózinshe, osy sanattaǵy ister - qoldanystaǵy qylmystyq is júrgizý zańnamasyna sáıkes, qylmys jaıly habarlamaý kisi óltirý jónindegi negizgi ispen birge sotqa jiberiledi.