«Salamatty Qazaqstan» medısınalyq poıyzy saparyn odan ári jalǵastyrýda.
Búginge deıin poıyz alty oblystyń, ıaǵnı Mańǵystaý, Atyraý, Aqtóbe, Batys Qazaqstan, Soltústik Qazaqstan jáne Aqmola oblystaryndaǵy 48 stansany aralady, dep habarlaıdy aqshamnews.kz Densaýlyq saqtaý mınıstrligine silteme jasap.
Joba aıasynda 10 myń balany qosa alǵanda barlyǵy 32 myń adam poıyzdaǵy medısına mamandaryna qaraldy, sonymen qatar olarǵa 91 myńnan astam medısınalyq qyzmet kórsetildi. Sonyń ishinde stomatologıalyq qyzmetter, zerthanalyq zertteýler, kishigirim hırýrgıalyq otalar, últradybystyq jáne rentgenologıalyq zertteýler bar.
Aýrýlardyń erte dıagnostıkasy men der kezinde emdelýine erekshe nazar aýdarylady. Qazirgi sátte júrek-qan tamyrlary aýrýlary, qant dıabeti jáne balalardyń aýrýlaryn qosqanda túrli dertke shaldyqqan 1933 naýqas anyqtaldy. 255 balany qosa alǵanda barlyq naýqastar turǵylyqty jeri boıynsha emhanalardyń turaqty baqylaýyna alyndy.
Joba tek dıagnostıkalaý úshin ǵana emes, sonymen birge kúrdeli jáne tótenshe jaǵdaıda shuǵyl medısınalyq kómek kórsetýde de mańyzdy bolyp shyqty. Máselen, Jaqsy stansasynda kardıologqa qaralǵan naýqastyń aýrýyn der kezinde anyqtaý arqyly ol bir ajaldan aman qaldy. Onyń boıynda mıokarda ınfarkti aýrýynyń belgileri anyqtalyp, dereý aýrýhanaǵa jatqyzyldy. Medısınalyq poıyz jabdyqtarynyń arqasynda qaýipti aýrýlardy jedel anyqtap, shuǵyl kómek kórsetý múmkin boldy.
Medısınalyq poıyzdyń jumysy áli de jalǵasýda, endi jyldyń sońyna deıin Qazaqstannyń 11 oblysyndaǵy taǵy 44 stansany qamtý kózdelýde. Joba komandasynda pedıatr, kardıolog, rentgenolog, hırýrg jáne basqalaryn qosa alǵanda 14 tar beıindi salalyq maman bar. Olardyń bári de elimizdiń eń shalǵaı jerlerindegi turǵyndardyń qajetti medısınalyq kómekti der kezinde jáne joǵary deńgeıde alýyna nıetti.
Eske sala ketsek, «Salamatty Qazaqstan» medısınalyq poıyzy» áleýmettik jobasy QR Prezıdenti janyndaǵy áıelder isteri jáne otbasylyq-demografıalyq saıasat jónindegi Ulttyq komısıa, QR Densaýlyq saqtaý mınıstrligi jáne «Samuryq-Qazyna» AQ kompanıalar toby atynan «Samruk-Kazyna Trust» áleýmettik jobalardy damytý qory arasyndaǵy yntymaqtastyq aıasynda júzege asyrylýda. Jobanyń basty maqsaty – shalǵaı stansalardaǵy turǵyndarǵa bilikti mamandardyń medısınalyq kómegin berý jáne densaýlyq saqtaý salasyna qaralýǵa múmkindigi shekteýli óńirlerdiń medısınalyq qyzmetke qoljetimdiligin arttyrý.