Bıyl Almatyda saılaý josparlanbaǵanyna qaramastan, saılaý prosesine qatysýshylardy kaskadtyq ádispen elektoraldyq oqytý jalǵasýda. Máselen, Jetisý aýdanynda «Respýblıka máslıhattarynyń depýtattaryn saılaý» taqyrybynda kezekti semınar ótti, dep habarlaıdy Aqshamnews.kz.
Semınar barysynda Jetisý aýdanynyń aýmaqtyq saılaý komısıasynyń músheleri óz tájirıbelerimen bólisip, keshendi testileý jáne praktıkalyq sabaqtar ótkizdi. Sondaı-aq, saılaý kezinde týyndaǵan jaǵdaılar boıynsha keısterdi jan-jaqty talqylady.
Júrgizilip jatqan sharalar saılaý komısıalarynyń quqyqtyq saýattylyǵy men jumysynyń tıimdiligin arttyrýǵa baǵyttalǵan. Aǵymdaǵy jyly aýmaqtyq komısıalar 1600 myńnan astam adamdy qamtıtyn túrli deńgeıdegi 21-den astam oqytý jáne aqparattyq-túsindirý is-sharalaryn josparlap otyr. Birinshi jartyjyldyqtyń qorytyndysy boıynsha 994 is-shara ótkizilip, oǵan 16 myńnan astam adam qatysty.
Almaty qalasynyń aýmaqtyq saılaý komısıasy saılaýshylardyń quqyqtyq mádenıeti men elektoraldyq belsendiligin arttyrýdyń ekinshi jarty jyldyqqa arnalǵan «Jol kartasyn» bekitti. Bul saılaýdy uıymdastyrýshylardy jáne saılaý prosesine qatysýshylardy oqytýdyń josparyn óz ishine qamtıdy. Aqparattyq-túsindirý komıksteri men beınerolıkter serıasyn ázirleýden bastap, saılaý komısıalary qyzmetiniń túrli baǵyttary boıynsha ádistemelik usynymdar ázirleýge deıin ártúrli deńgeıdegi 70-ten astam is-shara ótkizý josparlanýda. Almaty qalasynyń jas saılaýshylar klýbyn qurý, jas saılaýshylar qatarynan belsendiler pýlyn qalyptastyrý josparlanyp otyrǵanyn erekshe atap ótken jón, – deıdi Almaty qalasy saılaý komısıasynyń tóraıymy Aıgúl Qalyqova.