Almatyda Halyqaralyq jastar kúnine arnalǵan onkúndik aıasynda «Almaty – jastar qalasy» atty jańa mýraldyń ashylý saltanaty ótti. Jobany Almaty qalasy Jastar saıasaty basqarmasynyń qoldaýymen shyǵarmashyl jastar júzege asyrdy.
Ashylý rásimine Almaty qalasy Jastar saıasaty basqarmasy basshysynyń orynbasary Almaz Kenesbaı, belsendi jastar men aýdan turǵyndary qatysty.
«Búginde Almaty qalasynda 700 myńnan astam jas azamat turady. Bul – elimizdegi eń iri ári belsendi jastar ortalyǵy. Qalamyzdyń jastary ártúrli baǵytta damyp keledi: bireýleri ǵylymmen aınalyssa, endi bireýleri sport, óner, kásipkerlik pen eriktilik salalarynda jetistikterge jetýde. Biz bul mýral arqyly Almaty jastarynyń jan-jaqtylyǵyn, olardyń ashyqtyǵyn, shyǵarmashyl jáne zamanaýı kózqarasyn kórsetýge tyrystyq. Sonymen qatar, bul joba jas sýretshilerdiń shyǵarmashylyq áleýetin qoldap, olardy qalalyq mádenı keńistikke tartý maqsatynda júzege asyryldy»,– dedi Almaty qalasy Jastar saıasaty basqarma basshysynyń orynbasary Almaz Kenesbaı.
Aıta keteıik, Almaty qalasynda Halyqaralyq jastar kúnin merekeleýge arnalǵan onkúndik is-sharalar 2025 jyldyń 3 tamyzynda bastaý alǵan. Baǵdarlama aıasynda ekologıalyq aksıalar, sporttyq týrnırler, kvest oıyndary, jastar men áleýmettik jobalar kórmesi, Open Mic formatyndaǵy konsertter, bı saıystary jáne basqa da túrli baǵyttaǵy mádenı-buqaralyq sharalar uıymdastyrylýda.
Festıváldiń qorytyndysy – 12 tamyz kúni Balýan Sholaq atyndaǵy sport kesheninde ótetin GRAN FINAL bolmaq. Shara aıasynda qonaqtar men qala turǵyndaryn qazaqstandyq estrada juldyzdarynyń qatysýymen ótetin merekelik gala-konsert, sondaı-aq Almaty qalasynyń eń belsendi jastaryn marapattaý saltanaty kútedi. İs-sharaǵa kirý – tegin.