Búgin QR Ortalyq saılaý komısıasy janynan qurylǵan múmkindigi shekteýli azamattardyń quqyqtaryn qorǵaý jónindegi jumys tobynyń otyrysy ótti.
Jıynda 20 qarashada ótetin kezekten tys prezıdent saılaýynda múmkindigi shekteýli jandardyń daýys berýi úshin qolaıly jaǵdaı jasaý máselesi qaraldy, dep habarlaıdy Almaty-akshamy.kz QazAqparatqa silteme jasap.
«Ortalyq saılaý komısıasynyń qaýlysymen múmkindigi shekteýli azamattardyń quqyqtaryn qamtamasyz etý jónindegi jumys tobynyń erejesin jáne jumys tobynyń jańa quramyn bekittik. Jumys tobynyń quramyna 19 adam, onyń ishinde múmkindigi shekteýli tulǵalar qoǵamdyq birlesikteriniń 17 ókili kirdi», - dep atap ótti otyrysty ashqan OSK tóraǵasy Nurlan Ábdirov.
Osydan keıin QR OSK múshesi Anastasıa Shegorsova jergilikti atqarýshy organdar usynǵan derekterge sáıkes, saılaý ýchaskeleriniń 92 paıyzy pandýstarmen, 82,3 paıyzy ǵımaratqa kire beristegi taktıldi belgimen qamtamasyz etilgenin atap ótti. Sonymen qatar daýys berý kúninde 253 ýchaskege pandýs, 525 ýchaskege kire beristegi taktıldi belgi ornatylatyndyǵyn aıtty.
«Ýchaskelerdiń 95,2 paıyzynda múmkindigi shekteýli azamattar úshin arnaýly burysh jabdyqtaý josparlanyp otyr. Sonymen qatar ýchaskelerdiń 94,1 paıyzynda kabınalardy kreslo-koláskamen júretin azamattarǵa qoljetimdi qylyp jabdyqtaý kózdelip otyr. Daýys beretin kúni ınvataksı qyzmeti jumyldyrylatyn bolady», - dedi ol.