Máslıhat depýtattaryn saılaý Almatyda jáne Qazaqstannyń 10 óńirinde ótti.
Almatyda qalalyq máslıhat depýtatynyń saılaýy № 4 bir mandatty aýmaqtyq saılaý okrýgi boıynsha ótti. Básekelestik joǵary boldy. Alty úmitker halyq tańdaýyna úmitker boldy. Qalada 42 ýchaske jumys istedi.
- Saılaý ýchaskesine alǵash ret bala kezimde, ata-anammen birge keldim. Sodan keıin daýys berý prosesi maǵan erekshe nárse bolyp kórindi. Sondyqtan qazir kámeletke tolǵannan keıin men de óz daýysymdy berýge keldim. Úmitkerlerdiń baǵdarlamasyn aldyn ala oqyp, ózim úshin tańdaý jasadym, - deıdi 1-kýrs stýdenti Álisher.
Keıbiri daýys berýge balalaryn ertip keldi.
- Men saılaýǵa ulymmen birge keldim. Jasy 12-de. Kámeletke tolǵannan keıin daýys berý quqyǵyna ıe bolady. Qazirden-aq saılaýǵa baryp, daýys berýdi armandaıdy. Bul bolashaǵyna degen jaýapkershilikti bildiredi dep oılaımyn. Estelik úshin meni sýretke túsirdi,- deıdi almatylyq Natalá Glýshaeva.
Ýchaskelerdiń barlyǵynda halyqtyń barlyq toby úshin qajetti jaǵdaı jasaldy. Múmkindigi shekteýli azamattar úshin qoljetimdi orta uıymdastyryldy. Daýys berý tártibi týraly aqparaty bar aýdıorolıkter, sondaı-aq kózi nashar kóretin azamattar úshin kandıdattardyń ómirbaıandyq derekteri daıyndaldy, qajet bolǵan jaǵdaıda qulaqqaptar, kompúter, lýpa, arnaıy trafaretter usynyldy.
- Meniń kórý qabiletim nashar. Ýchaskeme kelgende meni qarsy alyp, kabınaǵa deıin shyǵaryp saldy. Úlkeıtkish áınek berdi, - dep bólisti almatylyq Lúbov Mıhaılova.
Baıqaýshylardyń aıtýynsha, saılaýda quqyq buzýshylyq bolmady. Almatylyqtar bul proseske jaýapkershilikpen qarady.
- Múmkindiginshe saılaýdan qalmaýǵa tyrysamyn. Bul jeke pikirin bildirý arqyly jarqyn bolashaqqa óz úlesin qosý dep bilemin, - dep atap ótti kompozıtor Álim Zaırov.
Ulttyq aza tutý kúni bolǵanyna qaramastan, kóptegen qala turǵyny saılaý ýchaskelerine kelip, azamattyq jaýapkershiligin tanytty.
- Men ýchaskege daýys berý aıaqtalýǵa qalǵanda keldim. Daýys berip úlgergenime óte qýanyshtymyn. Saılaýdy árqaısymyz úshin mańyzdy qadam dep sanaımyn. Óıtkeni biz daýys berý arqyly sanaly túrde bolashaqqa qadam jasaımyz, – dep atap ótti saılaýshy Galına Krasnoborodko.
Qorytyndysy boıynsha elimizde eki oblystyq depýtat, jeti qalalyq depýtat jáne 12 aýdandyq máslıhat depýtaty saılanady.