18 qarashaǵa deıin kandıdattar óz shtabymen birlese otyryp, halyqpen kezdesedi
Prezıdenttikke usynylǵan 6 kandıdat pen olardyń qoldaýshy shtabtary óńirlerdi aralýda. Ár kezdesýde turǵyndardyń kókeıtesti suraqtaryna jaýap berý, úmitkerlerdiń saılaýaldy baǵdarlamasyn tanystyrý syndy jumystar jalǵasyp jatyr, dep habarlaıdy Almaty.tv tilshisi.
Prezıdenttikke kandıdat Toqaevtyń respýblıkalyq qoldaý shtaby Almaty oblysyna bardy. Ótegen batyr kentindegi medısına qyzmetkerlerimen kezdesýde úmitkerdiń saılaýaldy baǵdarlamasynda kórsetilgen ulttyq densaýlyq saqtaý júıesin damytýdyń negizgi maqsaty talqylandy.
«Elimiz úshin taǵdyr sheshýshi kezinde biz durys tańdaý jasaýymyz kerek dep, durys el basqaratyn adamdy saılaýymyz kerek», – dedi QR Prezıdenttigine úmitker Q. Toqaevtyń respýblıkalyq qoǵamdyq shtaby múshesi Azat Perýashev.
Al úmitker Meıram Qajyken Abaı oblysyna saparynda kásipodaq ókilderimen jolyqty. Semeıdegi úgit-nasıhat jumystary kezinde medısınalyq ýnıversıtetke barǵan kandıdat rezıdent dárigerlermen jáne profesorlarmen kezdesip, óziniń saılaýaldy baǵdarlamasyn tanystyrdy.
«Halyq kóp jyldardan beri biz jeke óńir bolaıyq, oblys bolaıyq dep ańsaǵan eken. Jetti. Belsendi. Bolashaǵy bar», – dedi QR Prezıdenttigine úmitker Meıram Qajyken.
Aqtóbe oblysyna barǵan Prezıdenttikke kandıdat Qaraqat Ábden aımaqtaǵy isker áıeldermen kezdesti. Saılaýaldy tuǵyrnamasynyń negizgi basymdyqtaryna toqtalyp ótti. Odan bólek, bıznes ókilderiniń pikir almasyp, olardyń birqatar suraqtaryna jaýap berdi.
«100 prosent sol jumysqa berilse, jaqsy kórse, taza adal jasasa, barlyq esikter ashyq dep oılaımyn», – dedi kásipker Gúljazıra Eshnıaz
Kandıdat Jıgýlı Daırabaev Pavlodar oblysyndaǵy úgit-nasıhat jumystaryn Ekibastuz qalasynan bastady. Ardagerler keńesine at basyn buryp óńirdiń chempıonymen shahmat oınady. Sodan keıin halyq bazaryna baryp, azyq-túlik baǵasymen tanysty.
«Eshqandaı deldalsyz sharýalar tikeleı osy naryqqa kelip tapsyrady. Bir shetinen baǵa halyqqa qoljetimdi. Ekinshi jaǵynan sharýalarǵa múmkindik», – dedi QR Prezıdenttigine úmitker J. Daırabaevtyń respýblıkalyq qoǵamdyq shtaby basshysynyń orynbasary Anas Baqqojaev.
Prezıdenttikke opozısıalyq partıa atynan usynylǵan kandıdat Nurlan Áýesbaev Shymkentke saparynda qalalyq qoldaý shtabynyń jumysymen tanysty. Jaqtastarymen kezdesý kezinde pikir almasyp, úgit-nasıhat jumystary boıynsha uıymdastyrylatyn is-sharalardyń josparyn pysyqtady.
«Olar ózderiniń atqaryp jatqan jumystary týraly barlyq máseleler jóninde pikir almasyp, aldaǵy atqarylatyn jumystar týraly birshama kelisimge keldik», – dedi QR Prezıdenttigine úmitker Nurlan Áýesbaev.
Túrkistan oblysyna barǵan kandıdat Saltanat Tursynbekova «Shapaǵat» motıvasıa ortalyǵyna baryp, em alyp jatqan adamdarmen júzdesti. Keıin Kentaýdaǵy transformator zaýytyna at basyn buryp, ondaǵy mamandardyń birqatar suraqtaryna jaýap berdi.
«Máselelerdi qozǵadyq. Óndiris ornyn kórsettik. Endi eksportqa negizdelgen mekeme bolǵannan keıin problemasyz bolmaıdy. Solardy aıttyq», – dedi kásiporynnyń basqarma tóraǵasy Baýyrjan Qudaıbergenov.
Úmitkerler jáne olardyń jaqtastary úgit-nasıhat jumystaryn «Tynyshtyq» kúnine deıin ótkizedi. Oǵan deıin óńirlerdi aralap, turǵyndarmen kezdesý uıymdastyryp, saılaýaldy baǵdarlamasyn tanystyra beredi.