Aýyl sharýashylyǵy mınıstrliginiń mamandary arnaıy túsindirme jasady.
Aýyl sharýashylyǵy mınıstrliginiń mamandary tańbalaýdyń engizilýine baılanysty sút baǵasy ósedi degen aqparatqa baılanysty túsinikteme berdi, dep habarlaıdy Almaty-akshamy.kz.
Mamandardyń aıtýynsha, birqatar qazaqstandyq buqaralyq aqparat quraldary tańbalaýdyń engizilýine baılanysty sút baǵasynyń qymbattaýy týraly habarlama jarıalaǵan. Avtorlar súttiń bastapqy quny 29%-ǵa, al sońǵy tutynýshy úshin 40-50%-ǵa deıin qymbattaǵanyn aıtqan. Baǵanyń ósýi taýarlardy tańbalaý shyǵyndary esebinen bolady dep jazylǵan.
Osyǵan baılanysty Aýyl sharýashylyǵy mınıstrligi qazirgi ýaqytta Biryńǵaı operator sút ónimderin tańbalaý boıynsha pılottyq joba júrgizip jatqanyn habarlaıdy.
«Pılottyq alańdy elimizdiń 4 óńirinde ártúrli óndiris kólemi bar 7 sút óńdeý kásiporny usynǵan.Barlyq prosester «Atameken» UKP men salalyq qoǵamdyq birlestikterdiń tikeleı qatysýymen vedomstvoaralyq deńgeıde júzege asyrylady. Retteýshilik áserdi taldaýdy kelisýge jáne barlyq qajetti normatıvtik qujattardy qoǵamdyq talqylaýǵa bıznes ókilderi de qatysýda. Pılottyq jobany júrgizý kezinde áleýmettik-ekonomıkalyq táýekelder men quqyqtyq saldarlary eskeriletin bolady. Osyǵan baılanysty, pılottyq joba aıaqtalǵanǵa deıin sút ónimderi baǵasynyń qymbattaýy týraly tujyrymdamalar merziminen buryn jasalǵan dep sanaımyz», – delingen Aýyl sharýashylyǵy mınıstrliginiń baspasóz qyzmetiniń habarlamasynda.