Bul jerlerdi qurbandardy aqtaý maqsatynda qurylǵan óńirlik jumys toby anyqtady
Aqmola oblysynda saıası qýǵyn-súrgin qurbandary jazasyn ótegen 4 birdeı lagerdiń orny tabyldy. Tórteýi de Zerendi aýdanynyń aýmaǵynda ornalasqan, dep habarlaıdy Almaty-akshamy.kz «Habar 24» telearnasyna silteme jasap.
Buryn-sońdy beımálim bolǵan bul jerlerdi qurbandardy aqtaý maqsatynda qurylǵan óńirlik jumys toby anyqtady. Qýǵyn-súrgin qurbandary qamaýda bolǵan lagerlerdiń biri Úlgili aýylynyń mańynda ornalasypty. Tarıhshylar bul jerdi bir jyl boıy zerttedi. Munda tipti sottalǵandardy kúzetken ofıserlerdiń de zıraty bar eken.
«Jergilikti aqsaqaldardyń aıtýynsha, bul lager 1936 jyldan bastap 1952-1953 jyldarǵa deıin jumys istegen. 2 myńǵa jýyq adam sottalǵan. Negizinen bul jerde sottalǵandar saıası tutqyndar, muǵalimder de bolǵan, birin biri kórsetken aýyl predsedatelderi, bir ýys bıdaı úshin sottalǵandar da osy jerde otyrǵan kórinedi», – deıdi Zerendi aýdandyq memlekettik muraǵat dırektory Tilegen Seıfýllın.
Zertteýshiler bul araǵa arnaıy belgi ornatyp, qurbandarǵa Quran baǵyshtady. Endigi maqsat lager ornyna eskertkish qoıyp, munda bolǵandardyń tizimin anyqtaý.
Saıası qýǵyn-súrgin qurbandaryn aqtaý jónindegi jumys tobynyń otyrysyna tarıhshylardan bólek aýyl aqsaqaldary da qatysyp, kórgen-bilgenderin ortaǵa saldy.
Al qalǵan lagerlerdiń orny Barataı, Sımferopol jáne Prırechnyı aýyldarynyń mańynda ornalasqan. Endi olardyń bári jan-jaqty zerttelip, tarıhı jerlerge týrısik baǵyt ta ashylady. Tarıhshylar mundaı túrmeler Birjan sal aýdanynyń aýmaǵynda da bolýy múmkin degen boljam aıtyp otyr.