Búgin QR Ǵylym jáne joǵary bilim mınıstri Saıasat Nurbek Sıngapýrdaǵy Nanyang Technological University ókilderimen kezdesý ótkizdi.
İs-shara barysynda Sıngapýr men qazaqstandyq joǵary oqý oryndary arasyndaǵy ekijaqty yntymaqtastyq máseleleri talqylandy, dep habarlaıdy Almaty-akshamy.kz.
Mınıstr Nanyang Technological University basshylyǵyna Qazaqstannyń joǵary bilim jáne ǵylym júıesin damytý jáne nyǵaıtý maqsatynda mınıstrlik júrgizip jatqan reformalar týraly aıtyp berdi. Onyń ishinde, Memleket basshysy aıqyndaǵan Mınıstrliktiń negizgi basymdyqtarymen tanystyrdy.
«QR Prezıdenti Qasym-Jomart Toqaevtyń tapsyrmasy boıynsha Mınıstrlik Qazaqstanda sheteldik joǵary oqý oryndarynyń fılıaldaryn ashý boıynsha jumys júrgizýde. Qazirgi ýaqytta elimizde jetekshi álemdik joǵary oqý oryndarynyń birneshe fılıaldary ashylyp, yntymaqtastyq geografıasyn keńeıtý úshin jaǵdaılar jasaý qolǵa alynyp jatyr», - dedi Saıasat Nurbek.
Sonymen qatar, qonaqtar «Bolashaq» stıpendıalyq baǵdarlamasy jáne «500 ǵalym» baǵdarlamasymen tanysty. Mınıstrdiń aıtýynsha, «500 ǵalym» baǵdarlamasy aıasynda otandyq ǵalymdar sheteldik ýnıversıtetter men zertteý ortalyqtarynda ǵylymı taǵylymdamadan óte alady.
Óz kezeginde Sıngapýr ýnıversıteti prezıdentiniń orynbasary jáne provosty, profesor Ling San Nanyang Technological University qyzmeti týraly aıtyp berdi. Sondaı-aq, ol qazaqstandyq áriptesterin qyrkúıek aıynda ótetin onlaın-konferensıaǵa qatysýǵa shaqyrdy, shara barysynda qazaqstandyqtardyń osy joo-ǵa túsý múmkindikterin talqylaýǵa bolady.
Kezdesý sońynda taraptar qazaqstandyq joǵary oqý oryndarynyń Nanyang Technological University-men yntymaqtastyq perspektıvalaryn qarastyrdy. Mınıstr Saıasat Nurbek qonaqtarǵa sapary úshin alǵys aıtyp, joǵary bilim men ǵylym salasyndaǵy jemisti ózara seriktestikke úmit bildirdi.