Qazaqstanda 2022 jyldyń 1 qyrkúıegine deıin elge zańsyz ákelingen 220 myńnan astam avtokólik tirkeýge alyndy. Bul týraly QR İİM Ákimshilik polısıa komıtetiniń tóraǵasy Qaısar Sultanbaev aıtyp berdi, dep habarlaıdy Almaty-akshamy.kz QazAqparatqa silteme jasap.
Kólikke qandaı talap qoıyldy
Qazaqstanda 2022 jyldyń 1 qyrkúıegine deıin elge zańsyz ákelingen kólik quraldaryn zańdastyrý bıyl 23 qańtar - 1 shilde aralyǵynda júrgizildi.
Al ótinimdi ýaqytyly bergen jáne belgilengen merzimde avtomobılderdi zańdastyryp úlgermegen azamattarǵa olardy zańdastyrý quqyǵy 1 shildeden keıin de berilgen.
«Búgingi tańda barlyǵy 220 myńnan astam avtokólik zańdastyryldy. Zańdastyrý kezinde Memleket basshysynyń Joldaýynda belgilengen talaptardy naqty basshylyqqa alyp otyrdyq. Iaǵnı, 2022 jylǵy 1 qyrkúıekke deıin ákelingen, qylmystyq izdeýde bolmaǵan jáne kedendik rásimdeýden ótken avtokólikter zańdastyryldy», - dedi Q. Sultanbaev Ortalyq komýnıkasıalar qyzmetinde.
Zańdastyrýda qandaı máseleler týyndady
Spıkerdiń aıtýynsha, zańdastyrý barysynda birneshe probelmalar anyqtalyp, múmkindiginshe sheshilip otyrdy.
«Mysaly, qosalqy bólshekter túrinde ákelingen, elden tys jerlerge ıelikten shyǵarý jáne áketý quqyǵynsyz avtomobılderdi qazaqstandyq esepke qoıýǵa ruqsat etildi. Mundaı 17 myń avtokonstrýktor tirkelgen.
Ekinshiden, EAEO elderinde esepten shyǵarylmaǵan avtomobılder úshin, onyń ishinde shekteýlerge baılanysty zańdastyrý úshin, biraq olardy keri áketý ne zańdastyrý sharttarynda bastapqy tirkeýden ótý týraly mindettemesimen, basqa elde burynǵy tirkelgen jeri boıynsha esepten shyǵarylǵan jaǵdaıda 5 jylǵa ýaqytsha esepke qoıý arqyly zańdastyrý úshin keıinge qaldyrý múmkindigi berildi. Qazir 14 myńnan astam avtokólik ýaqytsha tirkeýge alyndy», - dep túsindirdi komıtet tóraǵasy.
Sonymen qatar EAEO aýmaǵynan tys úshinshi elderden, ásirese Grýzıadan ákelingen jáne kedendik tazartýdan ótpegen shamamen 15 myń avtokólik bar.
«Olardyń barlyǵy eski jáne ekologıalyq talaptarǵa sáıkes kelmegendikten, kedende rásimdelmegendikten Úkimet zańdastyrý sheńberinde olardyń ekologıalyq talaptarǵa sáıkestigin rastaýdy qajet etpeıtin arnaıy erejelerdi bekitti. Iaǵnı, 2022 jyldyń 1 qyrkúıegine deıin ákelingen, qylmystyq máselelerden basqa avtomobıl problemalary tolyq kólemde sheshildi», - dedi Qaısar Sultanbaev.
Sıfrlyq sheshimder jol apaty sanyn azaıtty
Kólikti zańdastyrý sheńberinde İshki ister mınıstrligi az ýaqytta azamattarǵa yńǵaıly bolý úshin, sybaılas jemqorlyq syn-qaterin azaıtý úshin aqparattyq júıeler ázirledi. Bul sıfrlyq jańartýlar egov portaly men ekinshi deńgeıli bankterdiń mobıldi qosymshalarynda kórsetildi.
«Bul sheshimder arnaıy HQO-da halyqtyń kóp jınalmaýyna múmkindik berdi. Osy oraıda ótken jyly sıfrlyq sheshimderdi qoldaný nátıjesinde qalalardaǵy jol kólik oqıǵalaryn da, qaza tapqandar sanyn da tómendetýge qol jetkizip otyrmyz. Sonymen qatar, jaıaý júrginshilerdiń de qaza tabýyn 11 paıyzǵa deıin tómendegenin atap ótkim keledi. Bıyl apattylyqtyń barlyq kórsetkishteri turaqty tómendep keledi. Sońǵy málimet boıynsha jol apattary sany 15 paıyzǵa deıin, jolda qaza tapqan jáne jaraqat alǵandar sany – 14 paıyzǵa deıin tómendep otyr. Iaǵnı, osy jumystar arqasynda elimizde 2 myńǵa jýyq azamat aman qaldy», - dedi Qaısar Sultanbaev.