Nur Otan partıasynyń kezekten tys sezinde birqatar ózgerister oryn aldy. Partıanyń Saıası keńes quramy ózgertildi. Bastysy, partıanyń atyn «Amanat» dep ataý týraly usynys aıtylyp, ol biraýyzdan qabyldandy. Májilis spıkeri Erlan Qoshanov jasaǵan bul usynysty Prezıdent Qasym-Jomart Toqaev qoldady.
Menińshe, bul ataý maǵan da unady. Kóńilimde jaqsy áser qaldyrdy, bir shýaqty sezingendeı boldym. "Amanat" sózi qulaqqa jaǵymdy, halyqqa jaqyn uǵym ǵoı. Meniń osy pikirimdi Memleket basshysynyń sıeze aıtqan: «Bul - elimiz úshin de, ultymyz úshin de aıryqsha máni bar kıeli uǵym. Egemendigimiz, eldigimiz ben birligimiz, keń-baıtaq jerimiz - bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Halqymyz eshqashan amanatqa qıanat jasamaǵan», - degen sózi qýattap turǵandaı.
Jasyratyny joq, basqarýshy partıa jumysty uıymdastyrýda, elge tıimdi sharalardy júrgizýde aıtarlyqtaı qatelikter jibergeni eshkimge qupıa emes. Nur Otan partıasy jańa saıası kúshterge tirkelýge múmkindik bermeı kelgeni de ras.
Endi saılanǵan jańa saıası quram osy olqylyqtardyń ornyn toltyrýy tıis. Partıadaǵy qaǵazbastylyqty, búrokratıany boldyrmaýy kerek. Májilis pen máslıhattaǵy partıa fraksıalarynyń halyq ıgiligine belsendi áreket jasaýyna kúsh salǵan jón.
Uly Abaıdyń: «Sóz túzeldi, oqyrman, sen de túzel» degen urandy sózi bar. Osy sóz jańa Qazaqstan qurýǵa qam jasap jatqan bizdiń qoǵamǵa qaratylyp aıtylǵandaı. Olaı bolsa, ataýy jańarǵan partıa atyna laıyq bolsa, ıgi.