Men kópqabatty úıde turamyn. Jaqynda óz erkimmen úıdiń qabyrǵasyn buzyp, esikti basqa jaqtan shyǵaryp, biraz jóndeý jumystaryn júrgizdim. Alaıda, «qurylys júrgizý úshin arnaıy quzyrly organnan ruqsat alý kerek» degendi estidim. Osy ras pa? Úıge ruqsatsyz jóndeý jumystaryn júrgizgenge qandaı jaza qoldanylady?
Saparáli PÁTTEEV,
Almaty qalasy.
Negizi, ruqsat almaı jatyp, úıdi jabdyqtaýǵa bolmaıdy. Ruqsatty keıin ala salamyn ǵoı dep nemquraıdylyqqa salynýdyń arty úlken ókinishke ákelip soqtyrýy múmkin. Mundaı kezde Qala qurylysyn baqylaý basqarmasy ruqsat qaǵazdy bermeıdi. Óıtkeni, baqylaý basqarmasy bolǵannan keıin, olar qandaı da bolsyn júrgizilgen qurylysty zańdastyryp, qabyldap alýy kerek. Seısmıkaǵa qaýiptiligin tekseredi. Osynyń barlyǵy qadaǵalanbaı jatyp ruqsat bere almaıdy. Sondyqtan úıdi ózgertpes buryn jergilikti Qala qurylysyn baqylaý basqarmasynan ruqsat alǵan jón. Onyń esh qıyndyǵy joq. Tek qana tórt-aq qujat kerek: jeke kýáligi, úıdiń qujaty, jobalaý-smetalyq qujattamaǵa saraptamanyń oń qorytyndysynyń kóshirmesi, sondaı-aq qurylys jasaıtyn merdigerdiń lısenzıasynyń bolýy. Mine, bary – osy.
Eger ruqsat almaı turyp páterdi, mekemeni ózgertip qoıǵan jaǵdaıda tekserý júrgizip, ákimshilik jazaǵa tartý kózdeledi. Aıyppul salynady. Sonymen qatar, tıisti orynnan ruqsat almaı turyp obektini ózgertken adamǵa páterin satqan jaǵdaıda nemese páterin kepilge qoıyp nesıe alǵysy kelse, tıisti organdar ruqsat bermeıdi.