Atyraý oblysynda ruqsatsyz jumys istep júrgen 50-den asa sheteldik anyqtaldy. Sheteldiktiń bireýi kólikti mas kúıde júrgizgen, dep habarlaıdy almaty-akshamy.kz
Atyraý oblystyq polısıa departamenti baspasóz qyzmetiniń aqparatyna súıensek, «Qaýipsiz jol» jáne «Mıgrant» jedel profılaktıkalyq is-sharalary ótip jatyr.
«İs-sharalardyń maqsaty — jol qaýipsizdigin saqtaý, kóshi-qon zańdylyǵyn buzǵan shetel azamattaryn anyqtaý. El aýmaǵynan óz erkimen ketý týraly sot qaýlysyn oryndamaǵan sheteldikterdi májbúrli túrde shyǵarý. Máselen, 19 aqpannan beri Atyraý qalasynyń aýmaǵynda zańsyz jumys istep júrgen 50-den asa sheteldik anyqtaldy. Ózge eldiń azamattaryna qatysty QR Ákimshilik quqyq buzýshylyq týraly kodeksiniń 517-babynyń 5-tarmaǵymen (Sheteldiktiń nemese azamattyǵy joq adamnyń júzege asyratyn qyzmeti vızada kórsetilgen maqsattarǵa sáıkes bolmaýymen kóringen, QR-nyń halyqtyń kóshi-qony salasyndaǵy zańnamasyn buzýy nemese jergilikti atqarýshy organ óz betinshe jumysqa ornalasýǵa ruqsatty alý eńbek qyzmetin júzege asyrýy) boıynsha ákimshilik hattamalar toltyryldy. Jınaqtalǵan is qujattary sotqa joldandy», -dep habarlady departamenttiń baspasóz qyzmeti.
Al keshe, 20 aqpanda alkogóldik mas kúıde kólik júrgizgen sheteldik ustalǵan.
«Polısıa qyzmetkerleri Atyraý qalasyndaǵy I.Taımanov dańǵyly boıynda Chevrolet Cobalt avtokóligin toqtatty. Tekserý kezinde kóliktiń Ózbekstan Respýblıkasynda tirkelgeni anyqtaldy. Al, kólikti atalǵan eldiń 1989 jylǵy turǵyny mas kúıde júrgizgeni dáleldendi», -dep málim etti departamenttiń baspasóz qyzmeti.
Mas sheteldikke qatysty QR Ákimshilik quqyq buzýshylyq týraly kodeksiniń 608-babynyń 1-bóligimen (Júrgizýshiniń kólik quralyn alkogóldik, esirtkilik jáne (nemese) ýytqumarlyq masań kúıde basqarýy, sol sıaqty kólik quralyn alkogóldik, esirtkilik jáne (nemese) ýytqumarlyq masań kúıdegi adamnyń basqarýyna berý) ákimshilik hattama toltyryldy.