«Qandy qańtar» oqıǵasy oılanbaǵannyń opyq jep, dúrbeleńniń dúrmekke ulasatynyn, arandatýdyń aıaǵy qaqpanǵa túsiretinin talaıǵa túsindirip bergendeı. Osy bir ashshy sabaqtan oı túıgen zamandastarymyz «Jaý joq deme – jar astynda, bóri joq deme – bórik astynda» degen qazaqtyń danalyq sózin túısingendeı. Aıdyń-kúnniń amanynda tatýlyq pen beıbit ómirimizdiń shyrqyn buzǵan qandy oqıǵa qaıtalanbasyn deımiz. Memlekettik tóńkeriske áreket etken, dúnıeni dúr silkintkendeı oqys oqıǵanyń sebep-saldary taldanyp, ádil baǵasynyń beriletinine senimdimiz.
Qaraly qańtar memleketimizdi qyrýar qarjyǵa shyǵyndar qyldy, qanshama ǵımarat qırady, dúkender tonaldy. Moroderlik, vandalızm áreketteri kórinis berdi. Adal eńbekpen nápaqasyn taýyp júrgen qanshama kásipker shyǵynǵa batty. Memleket qanshama aryz-shaǵymdy qarap, tıisinshe qarjylaı járdemin jasap jatsa da, áli de qaralyp jatqan shaǵymdar bar kórinedi. Salyǵyn tólep, el qorjynynyń jyrtyǵyn bútindep júrgen kásipkerlerge memleket qoldan kelgen kómegin aıap qalmas.
Memleketimiz materıaldyq shyǵyndy túgendep qana qoımaı, sarabdal saıasatymen el ishinde baıqalyp qalǵan rýhanı jutańdyqty da bútindeýi kerek dep oılaımyn. Óıtkeni, buqara arasynda táýelsizdiktiń qadirin túsine bilmegen teris pıǵyldylar áli de bar bop shyqty. Burq etken kóterilis memleketti kúıretýge yqpal etken ekstremıstik pıǵyldy bildirdi.
Lańkestik pen ekstremızm – jankeshtilikke úndeıtin jahandyq másele. Degenmen, jannan bezgen qarýly qaqtyǵysqa ıtermeleıtin mundaı turpaıy toptyq qylmys qandaı jaǵdaıdan týyndaıdy? Ony ábden zerttep, zerdeleý kerek. Rasymen, ekstremızm bir kúnde paıda bola salmaıdy ǵoı. Ol qaı zamanda da túrlishe pishinde bolǵan. Terrorlyq áreket saıası ne áleýmettik sebepke baılanysty jeke adamnyń ózine, kópshilikke, tipti memleketke qysym jasaý, olardy qorqytý maqsatynda jasalatyn qasaqana qylmys ekeni belgili. Áriden oılasaq, el ishinde áli de ádil sheshimin tappaǵan áleýmettik máseleler bar. Soǵan den qoıǵan abzal.
Ekstremıstik áreket kóbine-kóp basqa aǵymnyń jetegine ketip, dinı senimdi betke ustap, aldanyp, arbalyp júrgen adamdardyń qaperindegi oıdan týyndaýy múmkin. «Jandy jumys arqyly jansyzdar tabylady» demekshi, tap osy oraıda qaýipsizdik organdarynyń da qapy qalyp jatqan syńaıy baıqalady. Alys-jaqyn soǵystan kóz ashpaǵan birqatar shet elde «bas aýrýǵa» aınalǵan bul problemany sheshý joly tabylar emes. Qudaıǵa táýbá, Qazaqstan olardyń qatarynda emes. «Adasqannyń aldy jón, arty soqpaq» degen, baǵytynan jańylǵandardyń basym bóliginiń nıeti ońǵarylyp, úıirin tabaryna senimdimiz.
.