QR Premer-mınıstri Oljas Bektenov Qostanaı oblysyna jumys sapary aıasynda Rýdnyı qalasynda bolyp, Sokolov-Sarybaı taý-ken baıytý óndiristik birlestiginde (SSKÓB) qara metalýrgıanyń damýymen jáne Rýdnyı JEO-da jylytý maýsymynyń barysymen tanysty, dep habarlaıdy aqshamnews.kz
Premer-mınıstrge ERG kompanıasy men SSKÓB-tiń aǵymdaǵy kórsetkishteri men damý josparlary baıandaldy. SSKÓB jylyna 35 mln tonna ken, 9 mln tonna konsentrat jáne 8 mln tonna túıirshik óndiredi. 2024 jyly Reseı men Qytaıǵa 371 mlrd teńgeden astam somaǵa 9 mln tonna ónim eksporttaldy.
ERG bas dırektory Serik Shahajanov jylyna 2 mln tonna ystyq brıkettelgen temir (YBT) óndiretin jańa zaýyt qurylysy týraly jobany tanystyrdy. Investısıa kólemi 500 mlrd teńgeni quraıtyn bul zaýyt 1,1 myń jumys ornyn ashýǵa múmkindik beredi.
Oljas Bektenov YBT zaýytyn salý ındýstrıany nyǵaıtýǵa jáne memlekettiń básekege qabilettiligin arttyrýǵa yqpal etetinin atap ótti. Zaýytty qajetti gazben qamtamasyz etý úshin Aqtóbe oblysynan Qostanaı qalasyna deıin magıstraldy gaz qubyryn salý jobasy maquldanǵan.
SSKÓB quramyndaǵy Rýdnyı JEO-da negizgi jáne qosalqy jabdyqtardyń jóndeý jumystary aıaqtalyp, qajetti otyn men materıaldar qory daıyndalǵan. Qorshaǵan ortaǵa áserdi azaıtý úshin tútin qubyrlaryndaǵy shyǵyndylardy baqylaýdyń avtomattandyrylǵan júıesi engizilýde.
Oblys ákiminiń orynbasary Berik Tanjaryqov oblystaǵy jylytý maýsymynyń shtattyq rejımde ótip jatqanyn jáne jabdyqtardy jańǵyrtý arqasynda jylý jelileriniń tozýy 57%-dan 45,7%-ǵa deıin tómendegenin habarlady.
Oljas Bektenov ónerkásiptik nysandardyń úzdiksiz jumysyn qamtamasyz etetin komýnaldyq ınfraqurylymdy ýaqtyly jańǵyrtýdyń mańyzdylyǵyn atap ótti. Bul aımaqtaǵy turaqty damýǵa yqpal etetin negizgi faktor retinde baǵalandy.