Kórme 1 qarashaǵa deıin jalǵasady
Bıyl Halyq artısi, Halyq qaharmany, opera jáne estrada ánshisi Roza Baǵlanovanyń týǵanyna 100 jyl tolyp otyr. Mereıtoıǵa oraı Almaty mýzeıinde "Qazaq degen halyqtyń erkesimin!" kórmesi uıymdastyryldy, dep habarlaıdy Almaty-akshamy.kz Zakon.kz-ke silteme jasap.
Almaty mýzeıine kireberiste ańyz ánshi Roza Baǵlanovanyń oryndaýyndaǵy "Aq mańdaılym" áni shyrqalyp tur. Osydan-aq kelýshiler mýzeıde kimniń kórmesi uıymdastyrylyp jatqanyn ańdaı alady. Al mýzeıdiń eki bólmesine Halyq artısiniń jeke zattary, sahnalyq kostúmderi, áshekeı buıymdary, turmystyq zattary, marapattary, medaldary men foto-sýretteri qoıylǵan.
Jeke áshekeıleri jyltyrap, kózdiń jaýyn alady. Uqypty saqtalǵany birden baıqalyp tur. Artısiń jeke zattary men ata-anasynan qalǵan buıymdardy búginde ánshiniń uly Tájen Baǵlanov pen kelini Maral Baǵlanova kóziniń qarashyǵyndaı saqtap otyr. Osy kórmege arnap ánshiniń kelini men mýzeı qyzmetkerleri barlyǵy 300-ge jýyq jádigerdi tańdap alypty.
«Myna zattyń bári bizdiń úıde turǵan. Mýzeı qyzmetkerleri qasyma eki kómekshi bergen soń búkil buıymdy olarǵa kórsettim. Qyzmetkerler jádigerlerdi ózderi tańdap aldy. Olar zattardyń barlyǵyn kórsetýge, kórmege ádemilep ornalastyrýǵa tyrysty», - dedi Halyq artısiniń kelini Maral Baǵlanova.
Sonymen qatar Maral Baǵlanova kórmege qoıylǵan zattar búkil qazaq jurtyna tarıhtyń bólshegi retinde qorek bolady dep oılaıtynyn aıtty.
«Apamyzdyń 100 jyldyǵy otbasymyz úshin erekshe ótip jatyr. Biraz qobaljyp ári qýanyp júrmiz. Mýzeıden kórme ashaıyq dep atsalysqan uıymdastyrýshylarǵa alǵysymyzdy bildiremiz. Apamyzdan, ańyz adamnan qalǵan buıymdar bárimizge qorek bolady dep oılaımyn», - deıdi Maral Baǵlanova.
"Qazaq degen halyqtyń erkesimin!" kórmesi 1 qarashaǵa deıin jalǵasady. Almaty mýzeıler birlestiginiń Bas qor saqtaýshysy Raýzıa Tursynbekovanyń aıtýynsha, kórmeniń ereksheligi - Halyq artısiniń kórmesi alǵash ret úlken kólemde uıymdastyrylýy. Mýzeı qyzmetkerleri dál osy mádenı ordada kórme ashylǵanyn úlken qurmet dep sanaıdy.