Erkin kúresten Qazaqstan komandasynyń bas bapkeri Madıar Quramysov balýandardyń bıylǵy maýsymdaǵy kórsetkishin qorytyndylap, quramadaǵy ózgerister týraly aıtty, dep habarlaıdy almaty-akshamy.kz.
Bıyl otandyq erkin kúres sheberleri Azıa chempıonaty, álem birinshiligi men Azıa oıyndary syndy iri básekelerde baq synaǵan bolatyn.
«Álem chempıonatynan bir altyn, bir qolamen oraldyq. Rızabek Aıtmuhannyń araǵa jyldar salyp, tarıhty jańartqanyn bilesizder. Azamat Dáýletbekov qola medalmen birge, Olımpıada oıyndarynyń lısenzıasyn jeńip aldy. Bizge áli de joldama kerek. Jyldyń sońǵy jattyǵý jıynyn balýandar taýda ótkizedi. 18 kún boıy taýda jattyǵamyz. Jańa jylda jańa jarystar kútip tur», - dedi bas bapker.
Madıar Quramysovtyń aıtýynsha, aldaǵy maýsym óte jaýapty bolmaq.
«Sáýir aıynda Qyrǵyzstan astanasy Bishkekte Azıa aımaqtyq lısenzıalyq týrnıri ótedi. Sol básekede taǵy da eki joldama jeńip alýdy maqsat etip otyrmyz. Bizdiń balýandar úshin 57 jáne 65 kelide lısenzıa alý qıyn bolmaq. Sebebi, bul salmaqtaǵy básekelestik álem boıynsha óte joǵary. Atalǵan týrnırge úlken daıyndyqpen barýdy josparlap otyrmyz. Odan bólek, reıtıńilik týrnırler men Qazaqstan chempıonaty da bar», - dedi Quramysov.
Qańtar aıynda Astanada ótetin Qazaqstan birinshiliginde lısenzıalyq týrnırge qatysatyn balýandar belgili bolmaq. Sol synda álem chempıony Rızabek Aıtmuhannyń da jańa salmaqtaǵy áýselesi anyqtalady.
«Rızabek olımpıadalyq salmaq sanalatyn 97 kelige aýysty. Qazirgi tańda Azamat Dáýletbekovpen birge Osetıada jattyǵyp jatyr. Bul salmaqta Álisher Erǵalı syndy balýanymyz baryn da bilesizder. Kim myqty ekeni ulttyq chempıonatta sheshiledi. Sol básekede kim jeńse, lısenzıaǵa sol talasady», - dep qorytyndylady sózin bas bapker.