8 sáýir kúni respýblıka boıynsha «Taza Qazaqstan» ekologıalyq aksıasy bastaldy. Naýqan 5 aptaǵa sozylady. Ár aptanyń ózindik taqyryby men naqty maqsaty bolmaq, dep habarlaıdy almaty-akshamy.kz.
Naýqannyń alǵashqy kúninen 13 sáýirge deıin sozylatyn birinshi apta «Taza ólke» dep atalady. Bastapqy jeti kún ishinde eldimekenderdiń turǵyndary, qoǵam belsendileri, uıymdar men kásiporyndardyń qyzmetkerleri irgeles aýmaqtar men belgilengen aýlalardy tazalaıdy.
20 sáýirge deıin jalǵasatyn ekinshi aptaǵa «Kıeli meken» aty beriledi. Bul kúnderi tarıhı-mádenı eskertkishter aýmaǵyn abattandyrý jumystary júrgiziledi.
27 sáýirge deıingi úshinshi aptaǵa «Jasyl aımaq» taqyryby qoıylyp, bul aptalyqta aǵash kóshetteri otyrǵyzylady jáne aǵashtar ákteledi.
«Ónegeli urpaq» dep atalǵan kelesi aptalyq 4 mamyrǵa deıin jalǵasady. Aıtylǵan kúnderi ardagerler men qarttardyń aýlalary tazalanyp, olardy abattandyrýǵa kómek beriledi. «Móldir bulaq» aty berilgen sońǵy, besinshi aptada sý aıdyndary – ózender men kólderdiń aınalasy qoqystan tazartylady.
Aksıaǵa elimizdiń óńirleri qosylýda. Mysaly, respýblıkalyq aksıa Almaty qalasynda «Almaty – bizdiń ortaq úıimiz» jalpyqalalyq naýqany aıasynda ótedi. Onyń maqsaty:
- qala turǵyndary arasynda qoǵamdyq mádenıet deńgeıin arttyrý;
- qalalyq múlikke uqypty qaraýǵa úıretý;
- qoǵamdyq oryndardaǵy dórekilik pen qoǵamǵa jat teris minez-qulyqqa tosqaýyl qoıý;
- vandalızmge qarsy qoǵamdyq sana tárbıeleý;
Igi bastama aıasynda qazaqstandyqtar yntymaq pen ózara kómekke úıretetin, jaqsy qasıetterdi nasıhattaıtyn qaıyrymdylyq jáne mádenı is-sharalar ótedi.