Elordada Qazaqstan Respýblıkasy Prezıdentiniń atynan balalarǵa arnalǵan «Jańa jyl respýblıka tórinde» respýblıkalyq shyrsha toıy ótti.
Oǵan elimizdiń barlyq óńirlerinen 100-den astam bala qatysty, dep habarlaıdy Almaty-akshamy.kz
Shyrsha saltanatyna qatysýshylardyń ishinde on jasar Malıka Muhamedjanova da bar. Soltústik Qazaqstan oblysy Aqqaıyn aýdany Smırnovo aýylyndaǵy №2 mektep-gımnazıasynyń oqýshysy bul shara úshin arnaıy óz qolymen 100 tiri raýshan gúlinen sándi kóılek tigipti.
«Búgin bári ertegideı. Meni bul kórinis asa tań qaldyrdy. Barlyǵy sondaı sándi, men de búgingi saltanatqa oraı ózime ádemi kóılek tiktim. Mereke úshin rahmet!», - deıdi Malıka.
Otbasy úlgisindegi balalardy qoldaý ortalyǵynyń tárıelenýshisi, Mańǵystaý oblysynan kelgen Vıktor Boıarkın Prezıdentten shaqyrtý alǵany úshin alǵysyn bildirdi. Úshinshi synyp oqýshysy karatemen aınalysady jáne dombyrada oınaıdy.
«Shyrsha toıyna qatysqanym úshin asa qýanyshtymyn. Onyń ústine bizge kóptegen syılyqtar berildi. Osyndaı sheksiz qýanysh syılaǵan Prezıdentke jáne barsha qatysýshylarǵa rahmet aıtamyn», - deıdi ol.
Shyrshaǵa shaqyrylǵan balalarǵa Memleket basshysy Qasym-Jomart Toqaevtyń atynan Quttyqtaý hat tabys etildi.
«Aınalaıyn balaqaı! Seni Jańa jyl merekesimen quttyqtaımyn! Osy tamasha meıram ózińdi qýanysh pen shattyqqa bólesin! Ómiriń jarqyn sátterge toly bolsyn! Kitap oqy, sportpen shuǵyldan, tabıǵatty aıala jáne jaqsylyq jasaýǵa umtyl! Bilimpaz, eńbekqor, adal azamat bol! Asqaq armandaryń aqıqatqa aınalsyn! Saǵan zor densaýlyq, tolaǵaı tabys tileımin!», - dep jazdy Prezıdent balalarǵa arnalǵan quttyqtaýynda.
Balalarmen birge shyrsha shamyn elimizdiń bas pedagogi Ǵanı Beısembaev jaqty.
«Búgin ózderińiz syndy 6 mıllıonnan astam bala Jańa jyl merekesin toılaýda jáne respýblıkamyzdyń 20 óńirinen júzdegen bala osy Prezıdent shyrshasyna qatysyp, úlken merekeli toıdy birge ótkizýdemiz. Jalpy sizder osy úsh kún boıy ásem qalamyz Astananyń eń kórikti jerlerin araladyńyzdar. Onyń ishinde táýelsizdik sımvolyna aınalǵan Báıterekke de bardyńyzdar. Memleket sizderdiń baqytty balalyq shaqtaryńyz úshin barlyq múmkindikterdi jasaýda. Endigi jerde, qurmetti jas dostar, sizder de sabaqtaryńyzdy beske oqyp, sanaly tárbıe alyp, osy eldiń bedeldi, myqty azamaty bolyp ósýlerińizge barlyq maqsat-murattaryńyzdy arnaýǵa tıissizder», — dedi Oqý-aǵartý mınıstri.
Balalar úshin elordanyń úzdik shyǵarmashylyq ujymdarynyń 400 ártisi merekelik kóńil-kúı syılady, «Astana Opera» memlekettik opera jáne balet teatrynyń solıseri «Kúlbıkesh» spektakliniń qoıylymyn tartý etti. Balalar qazaqstandyq ataqty ártister Marjan Arapbaeva, Qaraqat Ábildına, Erjan Maksımmen shyrshany aınalyp án aıtyp, bı bıledi.
Shara sońynda barlyq qonaqtarǵa Qazaqstan Respýblıkasy Prezıdentiniń atynan jańa jyldyq syılyqtar tabys etildi.