Qazaqstan óz Táýelsizdigin alyp, Respýblıka bolyp qurylǵaly beri, kók týdy kókke jelbiretip, álemdik arenada elimizdi tanytyp kele jatqan sportshylarymyz az emes. Jyl saıyn elimizdiń tájirıbeli sportshylary ǵana emes, aǵa býynnyń artynan ergen jastarymyz da halyqaralyq jarystardan júldeli kelip júr. Mundaı sportshylardy naǵyz Respýblıka maqtanyshtary men el sportynyń bolashaǵy dep aıta alamyz.
Bıyl shynaıy sheberlik kórsetip, sporttyq mansabyn taǵy bir júldemen tolyqtyrǵan sportshylardyń biri – Samat Saǵatbekov boldy. Úsharal qalasynyń týmasy muhıt asyp, Domınıkan Respýblıkasynda ótken jaǵajaı sambo kúresinen erler arasyndaǵy Álem chempıonatynda qola júldege ıe boldy. Jarysta jalpy 4 beldesý ótkizgen ol qola úshin kezdesýde rýmyn palýanymen kezdesip jeńiske jetti. Ol buǵan deıin Qonaev qalasynda ótken jaǵajaı sambo kúresinen erler arasyndaǵy ishki birinshiliktiń chempıony atanǵan. Aıta ketken jón, Samat sporttyń bul túrimen 10 jasynan bastap aınalysyp keledi. Búginde ol sambo kúresinen Qazaqstan Respýblıkasynyń sport sheberi. Jeke bapkeri – Dáýren Jaınaqov.
Jyl ishindegi mańyzdy jeńisterdiń birin Arýjan Amangeldi ákeldi. Ol dzúdodan Dúnıejúzilik arnaıy jazǵy Olımpıada oıyndarynan júldeli oraldy. Germanıanyń Berlın qalasynda ótken arnaıy Olımpıda oıyndaryna 190 memlekettiń sportshylary qatysqan. 48 kelide baq synaǵan 21 jastaǵy qazaq arýy óz sheberligin kórsetip, qola júlde qanjyǵalady. Arýjannyń jattyqtyrýshysy Rýstem Karymsagýlov sportpen 1 jyl buryn ǵana aınalysa bastaǵan shákirtiniń álemdik arenadaǵy bul júldesi óte jaqsy nátıje ekenin aıtady.
Bıyl juldyzy janǵan jas sportshylardyń qatarynda Bektóre Oralhanov ta bar. Ol Lıvan eliniń astanasy Beırýt qalasynda ótken tekvandodan Álem chempıonatynyń qola júldegeri atandy. 2006 jyly dúnıege kelgen jas tekvandoshy 6 jastan bastap sportpen aınalysyp keledi. Onyń osy jylǵy júldesinen bólek, iri jarystarda ózge de jeńisteri bar: balalar arasynda QR chempıony, USA Open 2020 kadetter arasynda jeńimpazy Fujairah Open 2022 jeńimpazy jáne Austrian Open 2022 kúmis júldegeri. Bektóreniń búgingi bapkerleri – Rýslan Shakırov jáne Narıman Shakırov
