Qazaqstan-Reseı shekarasynda Qazaqstanǵa Reseı azamattary aǵyny aıtarlyqtaı óskeni baıqalady.
Sheteldikterdiń Qazaqstanǵa kelý erejesin «Halyqtyń kóshi-qony týraly» zańy jáne Úkimettiń «Kóship kelýshilerdiń Qazaqstanǵa kelýiniń jáne bolýynyń, sondaı-aq olardyń Qazaqstannan ketýiniń qaǵıdalaryn jáne kóshi-qon baqylaýyn júzege asyrý qaǵıdalaryn bekitý týraly» qaýlysy retteıdi, dep habarlaıdy Almaty-akshamy.kz
Osy erejelerge sáıkes, elde 30 kúnge deıin bolatyn sheteldikterge ýaqytsha tirkeý mindetti emes.
Reseıdiń Qazaqstandaǵy elshiligi málimetinshe, Reseı azamaty Qazaqstanda 30 kúnnen artyq qalǵysy kelse, mindetti túrde kóshi-qon qyzmetine tirkelýi kerek.
Osydan keıin elde bolý merzimi 90 kúntizbelik kúnge deıin ulǵaıtylýy múmkin (30+60). Bul merzim ótkennen keıin azamat Qazaqstannan ketýge mindetti. Qazaqstanǵa qaıta kelý elden ketken kúnnen bastap 90 kúntizbelik kúnnen keıin ǵana múmkin bolady.
Eger reseılikter Qazaqstanǵa jumys isteý úshin kelse, onda mundaı azamattardyń jáne olardyń otbasy músheleriniń ýaqytsha elde bolý merzimi Reseı azamatynyń Qazaqstandaǵy jumys berýshimen nemese jumysqa tapsyrys berýshimen jasasqan eńbek nemese azamattyq-quqyqtyq shartynyń uzaqtyǵymen shekteledi.
Mundaı azamattar Qazaqstanda bir aıdan asa bolýdy josparlasa, kóshi-qon polısıasyna tirkelip, eńbek shartyn usynýy qajet.
Qazaqstan aýmaǵyna kirgen kúnnen bastap 90 táýlik ótkennen keıin shart merziminen buryn buzylǵan jaǵdaıda, Reseıdiń jumysshy-azamaty Qazaqstan aýmaǵynan shyqpaı 15 kún ishinde jańa Eńbek nemese azamattyq-quqyqtyq shart jasasýǵa quqyly.
Eýrazıalyq ekonomıkalyq odaq týraly sharttyń 97-babyna sáıkes, Reseı azamattarynan Qazaqstanda jumys isteýge ruqsat alýy talap etilmeıdi. Reseı jumysshy-azamatynyń Qazaqstan aýmaǵyndaǵy eńbek qyzmeti EAEO týraly sharttyń erejelerin eskere otyryp, Qazaqstan zańnamasymen retteledi.
Sondaı-aq, Qazaqstanda sheteldikti elge kirgizýge bolmaıtyn pýnktter tizimi bar. Olardyń ishinde:
ulttyq qaýipsizdikti qamtamasyz etý, qoǵamdyq tártip pen halyqtyń densaýlyǵyn qorǵaý múddesinde;
eger onyń áreketi konstıtýsıalyq qurylysty kúshtep ózgertýge baǵyttalǵan bolsa;
Qazaqstannyń egemendigi men táýelsizdigine qarsy shyqsa, onyń terıtorıasynyń birligi men tutastyǵyn buzýǵa shaqyrsa;
ultaralyq, konfesıaaralyq jáne dinı arazdyqty qozdyrsa;
Qazaqstan azamattarynyń jáne basqa adamdardyń quqyqtary men zańdy múddelerin qorǵaý qajet bolǵan jaǵdaıda.