İs-sharanyń taqyryby – «Qazaqstandaǵy ınklúzıvti bilim berý úrdisi».
21 qyrkúıekte Abaı ýnıversıtetinde Qazaqstan Respýblıkasy Oqý-aǵartý mınıstrliginiń «Arnaıy jáne ınklúzıvti bilim berýdi damytýdyń ulttyq ǵylymı-praktıkalyq ortalyǵy» RMM dırektory Aıgerim Kýderınovanyń stýdenttermen beıresmı kezdesýi ótti, dep habarlaıdy Almaty-akshamy.kz.
Kezdesýge Abaı atyndaǵy QazUPÝ rektory Darhan Bilálov, Pedagogıka jáne psıhologıa ınstıtýtynyń dırektory Ǵalıa Abaeva jáne stýdentter qatysty.
Kezdesýdiń maqsaty – elimizdegi pedagogıka salasynda bolyp jatqan ózgeristerdi túsindirý, suranystaǵy mamandyqtardyń qyr-syrymen bólisý, bolashaq ustazdarǵa baǵyt-baǵdar berý.
Rektor bilim berý salasynda ınklúzıvti bilim berýdiń mańyzdylyǵyna toqtalyp, múmkindigi shekteýli jandardyń bilim alýǵa qoljetimdiligin qamtamasyz etý úshin memleket tarapynan jasalyp jatqan bastamalardy atap ótti. Sondaı-aq, erekshe bilim berý qajettilikteri bar balalardy oqytatyn mektepterdi joǵary kásibı mamandarmen qamtamasyz etý mindet ekenin aıtty. Sebebi, ókinishke qaraı, olardyń sany artyp keledi.
Inklúzıvtik bilim berýdiń tájirıbeli sarapshysy Aıgerim Kýderınova stýdentterge ınklúzıvtik bilim berýdiń erekshelikteri men múmkindikteri týraly jan-jaqty aıtyp, óz tájirıbesimen bólisti. Sonymen qatar, ýnıversıtet stýdentteri erkin formatta pedagogıkalyq is-tájirıbe barysynda jınaqtaǵan tájirıbeleri týraly aıtyp, jalpy jáne ınklúzıvti bilimge muqtaj balalarmen qalaı jumys isteý kerektigi týraly kóterilgen suraqtar boıynsha óz pikirlerin bildirdi.
Abaı atyndaǵy QazUPÝ ınklúzıvti bilim berýdi damytýǵa laıyqty úles qosyp kele jatqanyn aıta ketken jón. Máselen, osy jyly «Dara» qorynyń qoldaýymen ınklúzıvti bilim berýdiń oqý-zertteý zerthanasy ashyldy, onda osy saladaǵy sarapshylarmen birlesip ınklúzıvti jáne arnaıy bilim berý salasynda zertteýler júrgiziledi, stýdentterdi oqytý jáne jańa formasıadaǵy bilikti, praktıkaǵa baǵdarlanǵan pedagog kadrlardy daıarlaýda zerthana resýrstary men jańa salalyq tehnologıalardy paıdalaný kúsheıtildi.
