Qujattar jınaǵy jyl sońynda jaryqqa shyǵady
Reseıdiń memlekettik arhıvinen ult ustazy – Ahmet Baıtursynulyna qatysty tyń qujattar tabyldy. Bul týraly búgin elimizdiń arhıv isteri jáne qujattamany basqarý komıtetiniń ókilderi málimdedi, dep habarlaıdy Almaty-akshamy.kz Almaty.tv-ge silteme jasap.
Muraǵat salasyndaǵy yntymaqtastyq aıasynda ótken Qazaqstan-Reseı komısıasynyń otyrysynda 1927 jylǵy asharshylyq pen Ekinshi dúnıejúzilik soǵysyna qatysty jańa derekter jınaqtary jaryq kóretini belgili boldy. Kezdesý kezinde eki el arhıvısteri qujattardyń saqtalýyn qamtamasyz etý, olardy restavrasıalaý jáne elektrondyq formatqa kóshirý máseleleri boıynsha tájirıbelerin bólisti.
Muraǵat salasynyń basy-qasynda júrgen Gúlzıra Qarsaqbaeva osydan bir apta buryn Máskeýde Ahmet Baıtursynulyna qatysty tyń derek tabylǵany týraly aqjoltaı habardy jetkizdi. Málimetter úlken jobaǵa aınalyp, qujattar jınaǵy jyl sońynda jaryqqa shyqpaq.
«Ahmet Baıtursynovqa qatysty kóptegen qujattar Reseı memlekettik arhıvinde anyqtaldy. Qazir Ahmet Baıtursynulynyń 150 jyldyǵyna baılanysty qujattar jınaǵy daıyndalyp jatyr. Qazir olar bizge qoljetimdi. Ekijaqty kelissózder arqyly solardy alyp jatyrmyz, kóshirmelerin. Biz áli jarıalaǵan joqpyz, óıtkeni ony biz ǵylymı aınalymǵa engizý kerekpiz. Oǵan saraptama jasaý kerek. Sodan keıin baryp resmı jarıalanady», – dedi QR Arhıv isteri jáne qujattamany basqarý komıteti tóraǵasynyń orynbasary Gúlzıra Qarsaqbaeva.
Arhıvıster qujattarda qandaı derekter baryn ázirge aıta almaımyz, alaıda onda ult ustazynyń qyzmeti men jeke ómirine qatysty málimetter bolýy múmkin deıdi. Tulǵa týraly jańa aqparatty burynǵy bilim jáne ǵylym mınıstrligi suratqan. Qazir mamandar olardy saraptaýǵa kirisipti. Sondaı-aq arhıv isi salasyndaǵy halyqaralyq yntymaqtastyq negizinde Reseıden bıyl 1927-1934 jyldardaǵy asharshylyqqa qatysty da tyń derekter alynǵan.
«Birlesken jumystar kezinde sol jyldary bolǵan oqıǵalardyń jalpy kórinisin jan-jaqty jınaý biz úshin mańyzdy boldy. Reseı men Qazaqstannyń sol kezdegi qatynasyna qatysty obektıvti materıaldar jınaldy. Qandaı máseleler boldy, asharshylyqtyń zardaby qandaı boldy, bári qamtylady. Myńǵa jýyq deregi bar eki tomdyq jınaq jasaldy. 50 paıyzdan asa qujat alǵash ret bıyl jaryq kóredi», – dedi Reseı federaldyq arhıv agenttigi basshysynyń orynbasary Andreı Iýrasov.
Taǵy bir tarıhqa qatysty aýqymdy joba – Ekinshi dúnıejúzilik soǵysqa qatysqan qazaqtar týraly. Myńnan astam biregeı qujat eki tom bolyp jyl sońynda jarıalanady. Soǵys jyldaryna qatysty úlken kólemdegi jańa derekter ǵylymı aınalymǵa alǵash ret enbek. Bul –tarıhshylar úshin taptyrmas derekkóz.