Balabaqshalardyń 80%-y baqylaýdan óte almaǵan
QR Oqý-aǵartý mıınstri Asqat Aımaǵambetov mektepke deıingi uıymdardy lısenzıalaý qalaı júrgiziletinin túsindirdi, dep habarlaıdy Almaty-akshamy.kz QazAqparat-qa silteme jasap.
«2011 jyldan beri balabaqshalar jumysyn bastaý úshin lısenzıa almaıdy, tek qana jumysyn bastaǵany týraly habarlama beredi. 2021 jylǵa deıin olar memlekettik baqylaý ıaǵnı atestattaýdan da tolyǵymen bosatylǵan. Lısenzıadan bosatý týraly sheshim jekemenshik sektordyń jyldam damýyna, balabaqshamen qamtýdy 99 paıyzǵa jetkizýge áser etti. Biraq, sonymen qatar, ol sapany qamtamasyz etýge de teris áserin tıgizdi», - dep atap ótti mınıstr Úkimettiń búgingi otyrysynda.
Mınıstr sońǵy kezderi balabaqshalardyń jumysy boıynsha ata-analardyń aryzdary jıilep ketkenin aıtty.
«Osyǵan qaraı, 2021 jyly memlekettik baqylaýdy qaıta engizdik. Onyń nátıjeleri de problemalardy kórsetip otyr, balabaqshalardyń 80%-y baqylaýdan óte almady. Olar attestasıadan ótpeýine baılanysty, formaldy túrde jabylady, biraq lısenzıa boıynsha talap bolmaǵanan keıin sol ǵımaratta, sol problemalarmen qaıta ashylyp jumysyn jalǵastyra beredi. Osyǵan oraı, balalardyń qaýipsizdigin qamtamasyz etý, tárbıe sapasyn arttyrý, maqsatynda balabaqshalardy kezeń-kezeńmen lısenzıalaý engiziledi», - dedi A. Aımaǵambetov.
Sáıkesinshe, jańadan ashylatyn balabaqshalar endi lısenzıa alyp, barlyq talaptarǵa saı ekenin kórsetip jumysyn bastaıtyn bolady. Al qazir jumys istep jatqan balabaqshalar, táýekelderdi basqarý júıesi negizinde kezeń-kezeńmen lısenzıalanady.