Bas prokýratýra kezekti ekstradısıa týraly málimdedi. Qadaǵalaýshy organnyń aqparaty boıynsha, Qazaqstanǵa iri alaıaqtyq jasady degen kúdikke ilingen Ózbekstan azamatshasy jetkizildi, dep habarlaıdy aqshamnews.kz
2005-2007 jyldary bul azamatsha Almaty qalasyndaǵy qurylys kompanıasynda esepshi bolyp jumys istegen. Ol úleskerlerden aqsha qabyldap, jalǵan túbirtekter jazyp bergen. Alaıda, turǵyn úı kesheniniń qurylysy aıaqtalmaǵan.
«Onyń jáne qylmysqa qatysy bar basqa tulǵalardyń áreketteriniń saldarynan Almaty qalasynyń 80-nen astam turǵyny zardap shekti. Keltirilgen shyǵyn kólemi 3,7 mıllıard teńgeden asty», – dep habarlady Bas prokýratýra.
Alaıaqtyq jasalǵannan keıin kúdikti qashyp ketken jáne oǵan halyqaralyq izdeý jarıalanǵan. 2023 jyldyń jeltoqsanynda bul áıel Reseıdiń Krasnodar ólkesinde ustaldy. Qazaqstan prokýratýrasynyń suraýy boıynsha, ol ekstradısıalandy.
Endi kúdiktini 5 jyldan 10 jylǵa deıin bas bostandyǵynan aıyrý, sondaı-aq múlkin tárkileý jazasy kútip tur.