2024 jyly Qazaqstannyń sý qoımalary rekordtyq 75 mıllıard tekshe metr sý jınady. Onyń ishinde 12 mıllıard tekshe metr sý tasqyny kezinde kelgen sý, dep habarlaıdy aqshamnews.kz QR Sý resýrstary mınıstrligine silteme jasap
Balqash kóline bıyl 15,4 mıllıard tekshe metr sý kelip tústi — bul ótken jylmen salystyrǵanda 4 mıllıardqa kóp. Onyń shamamen besten biri sý tasqyny kezinde jınalǵan. Sonymen qatar, sońǵy 10 jylda alǵash ret Qapshaǵaı sý qoımasy tolyq kólemde toltyryldy.
Kaspıı teńizine jyl basynan beri 17 mıllıard tekshe metr sý quıylsa, Soltústik Aral teńizine 2,5 mıllıard tekshe metr sý jetti. Bul ótken jylmen salystyrǵanda 400 mıllıon tekshe metrge artyq.
«Bıyl sý qoımalaryn tolyqtyrý barysynda agrarııler men basqa da sý paıdalanýshylardyń múddeleri eskerildi. Máselen, sharýa qojalyqtary sýarý kezeńinde shamamen 11 mıllıard tekshe metr sý aldy», — dep túsindirdi Sý resýrstary mınıstri Nurjan Nurjigitov.
Qyzylorda oblysynda sý únemdeý tehnologıalaryn engizý nátıjesinde 200 mıllıon tekshe metr sý únemdelip, ol Soltústik Aralǵa baǵyttaldy. Jalpy, aımaqtaǵy kólder júıesine 4,7 mıllıard tekshe metr sý keldi, bul 2023 jylmen salystyrǵanda sál artyq.
Ulytaý oblysynan Qyzylorda óńirine 839 mıllıon tekshe metr sý jiberildi. Alǵash ret Sarysý ózeni arqyly ótken bul sý kólemi jergilikti kólder júıesine jetti.
Bul jetistikter sý resýrstaryn tıimdi basqarýdyń jáne jańa tehnologıalardy paıdalanýdyń aıqyn mysalyna aınaldy.