Reseıde tirkeýde bolmaǵan kólikter jalǵan reseılik nómirlermen elge kirgizilip jatyr
Bul týraly ákimshilik polısıa komıteti tóraǵasynyń orynbasary Serik Túsipov vedomstvonyń aqparat alańynda ótken onlaın brıfıńinde aıtty, dep habarlaıdy Almaty-akshamy.kz QazAqparatqa silteme jasap.
«İshki ister mınıstrligi sheteldik tirkeýi bar kólikterdi satyp alýdyń birneshe táýekeli bar ekenin eske salady. Birinshiden, júrgizýshilerge BUU-nyń jol qozǵalysy týraly konvensıasynyń talaptaryn saqtaý kerektigin eskergen jón. Ol boıynsha syrttan ákelingen kólikter Qazaqstan aýmaǵynda tirkeýsiz bir jyl ǵana júre alady. Bul ýaqyt bitkende, olar el aýmaǵynan syrtqa shyǵarylýy kerek. Eger ol talap oryndalmasa, kólik ıesine ákimshilik shara qoldanylady», - deıdi komıtet ókili.
Sondaı-aq, ol shetelden ákelingen kólikti tekserýsiz alýdyń sońy qylmystyq jaýapkershilikke aparýy múmkin ekenin eskertti.
«Taǵy bir eskeretin táýekel – qylmystyq qýdalaýǵa túsý táýekeli. Qazaqstandyq satyp alýshynyń shetelden ákelinetin kóliktiń qujattarynyń shynaıylyǵyn, urlanǵan nemese buǵatqa qoıylǵan kólik ekenin anyqtaý múmkindigi joq. Mundaı táýekel shetelden ákelinetin kólikterdiń bárinde bolýy múmkin. Saldarynan aqshaǵa satyp alǵan kólik tárkilenip, alýshynyń ústinen de qylmystyq is qozǵalýy múmkin. Mysaly, tekserý kezinde osy aıdyń basynan beri Óskemen, Petropavl, Semeı qalalarynda tirkeý qujattary men nómiri qoldan jasalǵan 80 reseılik avtomashına anyqtaldy. Iaǵnı, qazaqstandyq satyp alýshy kóligi Reseıde tirkelgenine senimdi bolǵanymen, Reseı Federasıasy keden qyzmetimen eshbir tirkeýde bolmaǵany anyqtaldy», - dedi Serik Túsipov.
Onyń aıtýynsha, atalǵan kólikter boıynsha Reseı Federasıasynyń İshki ister mınıstrligine resmı saýal joldanǵan.
İİM ókiliniń aıtýynsha, tıisti jaýap kelgen soń, atalǵan faktiler boıynsha zańnamada kórsetilgen prosesýaldyq áreketter qabyldanady.