Kórshi eldiń aýrýhanalarynda qazir 210 myńnan asa adam juqpaly dertke qarsy em-dom alyp jatyr, dep habarlaıdy almaty-akshamy.kz
Bılik bul jaǵdaıdan qaýiptenip, koronavırýstyń aldyn alatyn anyqtaý júıesin engizbek. Keı aımaqtarda indetke qarsy shekteýler engizile bastady. Máskeýde vırýs juqtyrý kórsetkishi buǵan deıingideı joǵarǵy deńgeıge jetpese de, jaǵdaı alańdarlyq.
Sońǵy bir aptada vırýstyń taralýy 30 prosentke artyp, aýrýhanaǵa túsken naýqastar sany 20 prosentke ósti. Qalada dertti aldyn ala anyqtaý júıesi, ıaǵnı adamdardy jappaı testileý engizilmek. İri saýda oryndarynda PTR-test tapsyrý ortalyqtary ashylyp, mektepterde testileý júrgiziledi. Al aýrýhanalarda respıratorlyq aýrý nyshanymen kelgen turǵyndardyń bári 10 mınýttyq ekspress-test tapsyrady.
İndettiń jańa oshaqtaryn tez anyqtaý óte mańyzdy deıdi mamandar. Sebebi qazir Reseıdiń barlyq aımaǵynda vırýstyń taralýy qaıta kúsh alyp, ólim-jitim kóbeıgen. Birqatar aımaqta QR júıesi engizilip, zeınetkerlerdiń vırýs juqtyrýy artqanyna baılanysty qarttardy oqshaýlaý qolǵa alyndy. Aýrýdan jazylyp shyqqan azamattar da táýekeli joǵary topqa jatqyzylǵan.
Qazir Reseıde koronavırýske baılanysty 976 myń adam dárigerlerdiń baqylaýyna alynǵan. Dertke qarsy halyqtyń 40 prosenti tolyq vaksına alyp, 49 mıllıony birinshi dozasyn saldyryp úlgergen.