Reseı – Qazaqstannyń eń basty saýda seriktesteriniń biri jáne ekonomıkamyzǵa qarjy quıǵan úsh jetekshi ınvestordyń qataryna kiredi.
Reseı Prezıdentimen ótken kezdesýde Memleket basshysy Qasym-Jomart Toqaev osylaı dedi. Bul týraly Aqorda málimdedi, dep habarlaıdy aqshamnews.kz,
Bul rette Qasym-Jomart Toqaev ekijaqty qatynastar tarıhynda Qazaqstan da tuńǵysh ret Reseıdiń bes iri saýda seriktesiniń sanatyna qosylǵanyn málimdedi. Bul eki eldiń yntymaqtastyq áleýeti joǵary ári berik ekenin ańǵartady.
– Osy oń dınamıka saqtalsa, bir-eki jylda ózara saýda-sattyq 30 mıllıardtyq mejege jetetinine senimdimin. Qazaqstan ekonomıkasyna Reseıden kelgen tikeleı ınvestısıa kólemi 24 mıllıard dollardan asty. Sońǵy eki jyldyń ózinde 4,5 mıllıard dollardan astam qarjy quıyldy. Qazaqstan da Reseı ekonomıkasyna qomaqty qarjy saldy. Búginde onyń kólemi 8,5 mıllıard dollarǵa jetti. Budan bólek, Qazaqstanda reseılikterdiń qatysy bar 24 myńǵa jýyq kompanıa jumys isteıdi. Bul – elimizdegi shetel kapıtalynyń úlesi bar jalpy kásiporyn sanynyń jartysyna jýyǵy. Atalǵan kórsetkishter strategıalyq qatynastardy odan ári nyǵaıtýǵa qos tarap ta asa múddeli jáne bir-birine senimi joǵary ekenin rastaıdy, – dedi Qazaqstan Prezıdenti.
Qasym-Jomart Toqaev ónerkásiptik kooperasıada aıtarlyqtaı tabysqa qol jetkizilgenine nazar aýdardy. Jalpy somasy 18 mıllıard dollardan asatyn 93 birlesken joba iske qosyldy. Qazirgi kezde jalpy ınvestısıa kólemi shamamen 30 mıllıard dollardy quraıtyn taǵy da 49 joba júzege asyrylyp jatyr.
– Qazaqstannyń birqatar aımaǵyna kógildir otyn jetkizý, Reseı energıa resýrstarynyń ońtústik jáne shyǵys baǵyttaǵy tasymal kólemin ulǵaıtý, elimizdegi iri energetıkalyq nysandardy salý jáne jańǵyrtý jumystaryn aýqymdy bastamalar retinde qarastyrýǵa bolady. Aldymyzda negizgi kúrejoldardy damytý arqyly tranzıt áleýetin barynsha paıdalaný mindeti tur. Sonymen qatar biz jańa jobalardy júzege asyrý perspektıvasyn, ásirese, Mońǵolıaǵa deıin avtokólik jolyn salý jáne Transaýǵan kólik dálizin belsendi qoldaný máselelerin talqyladyq. «Soltústik – Ońtústik» baǵytyndaǵy atalǵan barlyq bastamalardy iske asyrý dostas halyqtardyń túpkilikti múddesine tolyq saı keletinine kámil senemin, – dedi Memleket basshysy.
Prezıdent ekonomıkalyq kún tártibinde Qazaqstan men Reseıdiń Óńiraralyq yntymaqtastyq forýmy aıryqsha orynǵa ıe ekenine erekshe toqtaldy. Bul oraıda Memleket basshysy aldaǵy ýaqytta Aqtaýda Reseı Federasıasynyń Bas konsýldyǵyn ashýdyń mańyzy zor ekenin atap ótti.