Saraptama belgisiz zattyń salmaǵy shamamen 100 gram bolatyn «Gashısh» esirtkisi ekenin kórsetti
Soltústik Qazaqstan oblysynda shekarashylar elge esirtki alyp ótpek bolǵan Reseı azamatyn ustady, dep habarlaıdy Almaty-akshamy.kz.
QR Ulttyq qaýipsizdik komıteti Shekara qyzmeti SQO boıynsha departamenti baspasóz qyzmetiniń málimetinshe, oqıǵa 6 qazan kúni Maǵjan Jumabaev aýdanynda ornalasqan «Qaraqoǵa» avtomobıl ótkizý pýnktinde bolǵan. Shekaralyq baqylaý bólimshesiniń shekara narády jolaýshylardyń júkterin teksergen. Reseı azamaty ruqsat etilmegen zatty kúrteshesiniń ishki qaltasyna jasyryp, memlekettik shekaradan ótpekshi eken. Alaıda joly bolmady. Qyzmettik ıt ıisti alyp, er adamnan jasyl tústi belgisiz zat alyndy.
Saraptama belgisiz zattyń salmaǵy shamamen 100 gram bolatyn «Gashısh» esirtkisi ekenin kórsetti. Qazir sheteldikke qatysty tergep-tekserý amaldary júrgizilýde. Ustalǵan kúdikti Maǵjan Jumabaev aýdanynyń polısıa bólimine tapsyryldy.
Buǵan deıin Astana qalasy polısıa departamenti esirtki bıznesine qarsy is-qımyl basqarmasynyń bólim basshysy Sergeı Ilınyh esirtki saqtaǵany úshin jasóspirimderge qatysty 5 qylmystyq istiń tirkelgenin aıtqan edi.
Polıseıdiń aıtýynsha, jastar esirtki qylmysy 2015 jyldan beri asa aýyr qylmys túrine jatqyzylǵanyn bilmeıdi.