Talapty buzǵan tasymaldaýshy Qazaqstan Respýblıkasynyń zańyna sáıkes jaýapqa tartylady.
Zańǵa sáıkes tasymaldaýshy jolaýshy aldyndaǵy birqatar jaýapkershilikti oryndaýy kerek, dep habarlaıdy Almaty-akshamy.kz
Áýe reısimen sapar shekkende ushaq ýaqytynan keshikse nemese toqtap qalsa jolaýshyǵa Zań júzinde ótemaqy tólenedi.
"Qazaqstan Respýblıkasynyń áýe keńistigin paıdalaný jáne avıasıa qyzmeti týraly" Zańynyń 86-babyna sáıkes tasymaldaýshy jolaýshy aldyndaǵy birqatar jaýapkershilikti oryndaýy kerek.
Tasymaldaýshynyń mindeti:
Jeteginde jeti jasqa deıingi balasy bar jolaýshyǵa ana men bala bólmesin usynady.
Eger reıstiń jóneltilýi eki saǵattan astam ýaqyt keshikse jolaýshy halyqaralyq baılanys jelisi boıynsha qońyraý shalý nemese elektrondyq pochta arqyly eki habarlama jiberýge quqyly. Biraq qońyraý shalý ýaqyty 5 mınýttan aspaý kerek.
Sondaı-aq reıstiń jóneltilýin eki saǵattan asa kútken kezde salqyndatylǵan sýsyndarmen qamtamasyz etilýi kerek.
Reıstiń jóneltilýi tórt saǵatqa, tipti odan da kóp ýaqytqa keshikse kúndizgi ýaqytta - árbir alty saǵat saıyn, al túngi ýaqytta árbir segiz saǵat saıyn tasymaldaýshy jolaýshyny ystyq tamaqpen qamtamasyz etý kerek.
Eger reıstiń ushýy kúndiz segiz saǵattan asa jáne túnde alty saǵattan asa keshikse jolaýshylar qonaq úıge ornalastyrylady.
Qonaq úıge aparý jáne ákelýdi tasymaldaýshy ózi uıymdastyrý kerek. Bul úshin qaltańyzdan qarjy shyǵarmaısyz jáne qonaq úıge qosymsha aqy tólemeısiz.
Tasymaldaýshynyń taǵy bir mindeti – reıster ózgergen jaǵdaıda jolaýshylardyń uıaly telefon baılanysyna habarlama jiberý jáne qandaı qyzmetter kórsetiletini týraly aqparat jiberý kerek.
Reıs 5 saǵattan astam keshikse qandaı qyzmet kórsetiledi?
Tasymaldaýshynyń kinásinen reıs bes saǵattan astam ýaqytqa keshikse tasymaldaýshy jolaýshynyń óz qalaýymen bılette kórsetilgen baǵytyna jaqyn arada ushatyn reıspen jetýin qamtamasyz etedi. Bolmasa jolaýshyǵa bılettiń tolyq qunyn qaıtarýǵa mindetti.
Jolaýshysyn mejeli ornyna jetkize almaǵan tasymaldaýshy merzimin ótkizip alǵan árbir saǵat úshin bılet qunynyń 3 prosentin aıyppul retinde tóleýge mindetti. Onda da tasymaldaýshy reıstiń keshigýi eńserilmeıtin kúsh saldarynan bolǵanyn dáleldeı almasa tóleıdi. Aıtpaqshy, aıyppul somasyn satyp alynǵan tarıf qunynan asyrýǵa bolmaıdy.
Aıyppul jolaýshynyń ótinishimen tasymaldaýshynyń ınternet-resýrsy jáne bıletter satý pýnktteri arqyly júrgiziledi.