Qyrkúıekte Almaty qalasyndaǵy ADK stadıonynda Qazaqstannyń joǵarǵy lıgasy komandalary arasynda regbı-7 boıynsha tórtinshi týr oıyndary ótti. Birinshilik jeńimpazy bes týr qorytyndysy boıynsha anyqtalady. Bul joly da oıyndar asa qyzyqty ári tartysty ótti. Komandalar eki topqa bólinip, barlyǵy jeti ujym baq synady.
Fınaldyq Almaty oblysynyń «Beıbarys» komandasy men Astana qalasynyń quramasy kezdesip astanalyqtar 27:0 esebimen jeńiske jetti
Úshinshi oryn úshin tartysty oıyn Aqtaýdyń «Kaspıı» komandasy men Almatynyń «Gvardıa-Dınamo» ujymynyń arasynda ótti. Tájirıbeli «Kaspıı» bul kezdesýde 36:10 esebimen jeńiske jetip, týrnırdiń júldeli úshinshi ornyna ıe boldy.
Al ár týr saıynǵy basty báseke bıyl da dástúrli sıpat aldy – fınalda taǵy da Almatynyń «Azıa-sport Dınamo» jáne Taldyqorǵannyń «Olımp» kásibı regbı klýby kezdesti. Bul eki komanda – elimizdegi eń myqty ujymdar, sondyqtan olardyń kezdesýi árdaıym kórermenge qyzyqty ári tartysty oıyn syılaıdy. Qos ujym bir-biriniń stılin jaqsy meńgergen. Qazaqstan quramasynyń negizgi quramy da osy eki komandanyń oıynshylarynan jasaqtalǵan.
Bul jolǵy básekede Almaty komandasy 26:5 esebimen aıqyn basymdyqpen jeńiske jetti.
Aıta ketý kerek, sońǵy jyldary elimizde erler men áıelder quramalarynyń regbı-7 oıynyndaǵy deńgeıi aıtarlyqtaı jaqsardy. Buǵan Ońtústik Afrıka Respýblıkasynan (OAR) kelgen bilikti bapkerlerdiń úlesi zor. Áıelder quramasyna keńesshi retinde qosylǵan — Fabıan Djýrıs. Al erler quramasynyń bas jattyqtyrýshysy bolyp Lúdvıch Germanýs taǵaıyndaldy. Sonymen qatar, erler men áıelder quramalarynyń jalpy daıyndyǵyna jaýapty jattyqtyrýshy qyzmetin Iohannes Zarıashqarıs atqarady.
2025 jyldyń tamyz aıynda Qazaqstan regbı federasıasy erler men áıelder komandalary úshin OAR-da úsh aptalyq oqý-jattyǵý jıyndaryn uıymdastyrdy. Bul jıyndar komandalar úshin óte paıdaly ári nátıjeli boldy. Áıelder quramasynyń jattyqtyrýshysy Svetlana Klúchnıkova jıyn barysynda kóptegen jańa ıdeıalar, strategıalyq tásilder men zamanaýı jattyǵý ádisterin úırengenin atap ótti. Jıyn barysynda bizdiń quramalar OAR premer-lıgasynyń komandalarymen joldastyq kezdesýler ótkizdi. Qarsylastarmen teń dárejede oınap, birde jeńip, birde jeńilip otyrdy. Al álem chempıony sanalatyn OAR quramasyna qarsy oıynda bizdiń oıynshylar ese jiberdi.
Qazaqstan quramasynyń kapıtany Rasýlmagomed Magomedov bul jıyndardyń joǵary deńgeıde ótkenin, álemdik deńgeıdegi úzdik komandalarmen kezdesip, tájirıbe jınaǵandaryn aıtty. Onyń aıtýynsha, OAR komandalary óte jyldam ári tehnıkalyq jaǵynan jaqsy oınaıdy, al bizdiń quramalar kúshti ári fızıkalyq qarymymen erekshelenedi.
Aldaǵy ýaqytta Qazaqstan quramalary Oman memleketinde ótetin Azıa lıgasyna irikteý týrnırine qatysyp baqtaryn synap, Azıanyń joǵary dıvızıonyna joldama alýǵa tyrasady.
Úmitimiz zor — kásibı mamandardyń jetekshiligimen otandyq regbıshilerimiz jańa belesterdi baǵyndyrady dep senemiz.