Bul sportshylardyń árqaısynyń erikti tańdaýy boldy.
QR regbı boıynsha ulttyq áıelder quramasynyń, sondaı-aq «Azıa Sport» regbı klýby men jaǵajaı voleıbolynan QR quramasynyń oıynshylary koronavırýsqa qarsy nelikten ekpe alǵany týraly aıtty, dep habarlaıdy Almaty-akshamy.kz.
Regbı boıynsha QR Ulttyq áıelder quramasynyń múshesi Daıana Qazybekova vaksınadan keıin ózin jaqsy sezingenin, kelesi kúni jattyǵýǵa kiriskenin aıtty. Onyń komandasynda barlyq sportshylar jattyqty, bul árqaısynyń erikti tańdaýy boldy.
«Biz indet ýaqytynda jalǵyz jattyǵýdan sharshadyq, óıtkeni regbı – bul komandalyq oıyn. Biz jarysqa qatysyp, jankúıerlerdiń qoldaýyn kórgimiz keledi. Múmkin, bizdiń osy sheshimimiz basqalar úshin úlgi bolar. Búginde vaksına alý óte mańyzdy», - dedi Daıana.
Onymen komandanyń taǵy bir múshesi, regbı boıynsha halyqaralyq dárejedegi sport sheberi Dıana Ábisheva da kelisetinin bildirdi.
«Men birinshi bolyp vaksına aldym. Menen keıin komandadan taǵy úsh qyz ekpe aldy. Sportshylar jarystarǵa qatysý úshin únemi jolda júredi, sondyqtan bizge qalamyz ben respýblıkamyzdyń ózge óńirlerine barǵanda alańsyz júrý úshin vaksına alý mańyzdy», – deıdi Dıana.
Vaksına alǵan qala turǵyndarynyń arasynda halyqaralyq dárejedegi sport sheberi, «Azıa Sport» regbı klýbynyń oıynshysy Sergeı Denısúk ta bar. Ol Vaksına oılap tabylyp, ekpe alatynyn indettiń basynda bildi.
«Bul múmkindik paıda bolǵannan keıin men ekpe pýnktine baryp, vaksına aldym. Osy ýaqyt ishinde súıikti isimmen aınalysa almadym. Sportshy úshin bul qıyn. Vaksınany oılap tapqandary jaqsy boldy. Bizge qalypty ómirge oralýǵa múmkindik berildi. Bul - qarapaıym ómirdi bastaýdyń jalǵyz joly. Komanda dárigeri Almatyda vaksına paıda bolǵanyn aıtty. Sondaı-aq, meniń otbasym bar, balam ósip keledi, sondyqtan olardy qorǵaý - meniń mindetim. Ineksıa eshqandaı asqynýsyz ótti. Men bárine vaksına jasaýǵa keńes beremin», - deıdi Sergeı Denısúk.
Jaǵajaı voleıbolynan QR quramasynyń múshesi Sergeı Bogatý ótken jyldy qınala eske alady. Koronavırýstyq indet kópten kútken birqatar jarystardy toqtatty.
«Biz ádette shetelde jyly elderde jattyǵamyz. Koronavırýs buǵan jol bermedi. Biz jabyq zalda boldyq. Vaksınanyń arqasynda alǵashqy jıyndarǵa shyǵý múmkindigi paıda boldy», - deıdi Sergeı Bogatý.
Bárinen buryn sportshy anasynyń densaýlyǵyna alańdaıdy. Sebebi jasy ulǵaıǵan jandardyń ınfeksıany juqtyrý qaýpi joǵary.
«Anamdy qorǵaý úshin men ózimdi qorǵadym. Meniń oıymsha, ýaqyt óte kele, biz vaksınanyń qajet ekenin túsinemiz. Aınalamyzda naýqas adamdardyń kóp ekenin kórip, vaksına alý mańyzdy», - dep jalǵastyrdy jaǵajaı voleıbolynan QR quramasynyń oıynshysy.
Aıta ketsek, Almatyda medısınalyq uıymdarda, mektepterde, mádenıet, sport nysandarynda, bazarlar men qalanyń SOSO-da 208 vaksına pýnkti jumys isteıdi. Olardyń sanyn 250-ge deıin ulǵaıtý múmkindigi bar. 1256 adamnan 307 ekpe brıgadasy bar. Ekpeni kún saıyn, demalyssyz alýǵa bolady.