Baǵytymyzdy ózgertpeımiz.
Tóńkerisshiler elimizde qolǵa alynǵan reformalarǵa kedergi keltirýge tyrysty. Bul týraly «QAZAQSTAN» ulttyq telearnasyndaǵy suhbaty kezinde Memleket basshysy Qasym-Jomart Toqaev málim etti, dep habarlaıdy Almaty-akshamy.kz QazAqparatqa silteme jasap.
Suhbat barysynda tilshi tóńkerisshiler bılikke nege qarsy shyqqanyn surady.
«Másele mynada: tóńkerisshiler elimizde qolǵa alynǵan reformalarǵa kedergi keltirýge tyrysty. Tipti Prezıdentke de qarsy boldy. Ózgerister olardyń múddelerine tıimdi emes edi. Óıtkeni, reformalardyń basty maqsaty – ádiletti qoǵam ornatý, monopolıalardy joıý, saıası transformasıa jasaý, elimizdiń ekonomıkalyq damýyn jedeldetý. Halyq ta osyny talap etip otyr. Sondyqtan, baǵytymyzdy ózgertpeımiz, reformalar mindetti túrde óz jalǵasyn tabady», - dedi Prezıdent Qasym-Jomart Toqaev.