Prezıdent Qasym-Jomart Toqaev osy suraqqa jaýap berdi.
Búgin daýys berip jatqan Konstıtýsıa baptaryn júzege asyrýymyz kerek, dedi prezıdent, dep habarlaıdy Almaty-akshamy.kz
Prezıdent Qasym-Jomart Toqaev referendýmnyń oń nátıjesi shyqqan jaǵdaıda biraz jumys atqarý qajet bolatynyn málimdedi.
«Aldymyzda biraz jumys bar. Búgin daýys berip jatqan Konstıtýsıa baptaryn iske asyrýymyz kerek. Zańnamaǵa ózgerister engizý qajet. Atap aıtqanda, partıa men parlamentke qatysty túzetýler bar. Menińshe, bizdiń parlamentimiz ol jumysty abyroımen atqara alady. Búgin halqymyz daýys berip jatqan jańalyqtar elimizdiń qoǵamdyq ómirine kóptegen ózgeris ákeledi. Shyn máninde, memleket pen qoǵam arasyndaǵy qarym-qatynas paradıgmasy ózgeredi. Adam quqyqtary birinshi orynǵa shyǵady» , - dedi Toqaev referendým aıasynda ótken brıfıńte.
Osy oraıda prezıdent Konstıtýsıaǵa engiziletin túzetýler boıynsha Adam quqyqtary jónindegi ýákilge jańa mártebe beriletinin erekshe atap ótti. Al memleket basshysy halqyna adal qyzmet etýge jáne Konstıtýsıany qatań saqtaýǵa mindetti. Toqaev ony basty qaǵıda retinde ustanatynyn jetkizdi.
«Aldymyzda turǵan maqsatymyz, jumysymyz óte aýqymdy. Bárimiz ult bolyp, el bolyp, jumys isteýimiz kerek. Elimizdiń qaýipsizdigine tónetin qaýip-qater az emes. Sondyqtan elimiz óte qyraǵy bolýy kerek. Bárimiz bir judyryq bolyp, qaýip-qaterge toıtarys berýimiz kerek», - dep atap kórsetti Toqaev.