Mynadaı túzetýler engiziledi
Qazaqstanda 5 maýsym kúni konstıtýsıaǵa ózgeris engizýge arnalǵan respýblıkalyq referendým ótkizý belgilengen. Alaıda kópshiliktiń arasynda referendýmnan keıin ne ózgeretini, qandaı zańdardyń alynyp tastalatyny jóninde túrli boljamdar bar. Belgili saıasattanýshy Marat Shıbutov referendýmnan keıin prezıdenttiń ókilettigi qandaı jolmen qysqaratynyn túsindirip berdi, dep habarlaıdy Almaty-akshamy.kz Stan.kz aqparat agenttigi-ne silteme jasap.
Shıbutovtyń sózinshe, konstıtýsıaǵa prezıdenttiń ókilettikterine qatysty mynadaı túzetýler engiziledi:
1. QR prezıdenti óz ókilettikterin júzege asyrý kezeńinde eshbir saıası partıanyń múshesi bolmaýy tıis.
2. QR prezıdentiniń jaqyn týystarynyń memlekettik saıası qyzmetshiler, kvazımemlekettik sektor sýbektileriniń basshylary laýazymdaryn atqarýǵa quqyǵy bolmaıdy.
3. Prezıdent 15 senatordyń ornyna tek 10-yn ǵana taǵaıyndaı alady.
4. Joǵary sot keńesiniń tóraǵasyn taǵaıyndaý úshin prezıdent senattyń kelisimin alýy kerek.
5. Eger buryn prezıdent oblys/respýblıkalyq mańyzy bar qala ákimi laýazymyna máslıhat depýtattyǵyna 1 kandıdatty usynsa, ózgeristerden keıin keminde 2 kandıdatty usynatyn bolady.
6. Prezıdent oblystar, respýblıkalyq mańyzy bar qalalar jáne astana ákimderi aktileriniń kúshin joıa almaıdy nemese ony toqtata almaıdy.
Saıasatker osy ózgeristerden keıin prezıdenttiń bılikke taǵaıyndalǵan týystarynyń nemese partıa basshylyǵyn taǵaıyndaý arqyly saıasatqa yqpal etý múmkindigi tómendep, bul parlamentti táýelsiz etetinine senim bildiredi.
"Ózge aımaqtar úshin de prezıdenttiń róli tómendeı túsedi. Postkeńestik elderde (Ázirbaıjan, Túrkimenstan, Tájikstan kelesi kezekte) bılikti urpaqtan urpaqqa qaldyryp jatqan ýaqytta bul sózsiz alǵa jyljýdyń belgisi", - deıdi Marat Shıbutov.