Prezıdent Q.J.Toqaevtyń eki apta burynǵy Joldaýyndaǵy birinshi tarmaq pandemıadan keıingi kezeńdegi ekonomıkalyq damýǵa arnalǵan edi. Eki jyldan beri eki ókpeden qysyp turǵan pandemıada aldymen ekonomıka salasy aıtarlyqtaı zardap shekkeni ras. Memleket basshysy Joldaýda tyǵyryqtan shyǵýdyń jolyn kórsetti.
Meniń oıymsha, dál qazir aýyl sharýashylyǵyna aıtarlyqtaı nazar aýdaryp, shaǵyn qalalar men megapolıstiń shetki aımaqtaryn damytýǵa kúsh jumsaý kerek. Alysqa barmaı-aq bir mysal keltirsem, 1 mıllıardtan astam turǵyny bar kórshi el jasandy, sapasyz tamaqtan sharshady. Olar ózderiniń tamaǵynan shyǵyp, tabıǵı ónimge den qoıa bastady. Bizdiń shyǵys óńirden olar Qazaqstanda óndirilgen sapaly ónimderdi satyp alatynyn jaqsy bilemiz. Keń-baıtaq jerimizde ózimiz aýyl sharýashylyǵyna basymdyq berýdiń ornyna biz sapasyz ári qunarsyz sheteldik ónimderdi satyp alyp otyrmyz. Aýyl sharýashylyǵynan keıin bizge el ishinde logıstıkany damytý qajet. Sebebi, bizdiń elimizde aımaqishilik saýda óte nashar. Mańǵystaýda azyq-túlik qymbat. Nege? Sebebi, Almatydan jetkizý ol jaqqa aıtarlyqtaı qymbatqa túsedi. Sol úshin Qazaqstannyń ár buryshynan basqa bir núktesine deıin biz óz ónimderimizdi arzan ári jaqsy kúıde jetkize alýymyz kerek. Osy jerde oblystar arasyndaǵy logıstıkany damytý ózi-aq suranyp tur.
Qazir «Ónerkásip týraly zań» daıyndalýda. Soǵan qatysty mynadaı usynysym bar. Buryn ekonomıkalyq geografıa degen pán oqytylatyn. Sol bizge qazir aýadaı qajet der edim. Úkimet qazir qaı óńirde qaı salany damytý kerektigin jaqsy bilý kerek. Bir-birimen baılanysty 3–5 ındýstrıanyń damýyna basymdyq berý qajet.
Máselen, ol qoımalar júıesi ne aımaqtyq logıstıkalyq kompanıalar bolýy múmkin. Iaǵnı qandaı kásiporyndy qaı óńirde ashyp, ony qaı aımaqtarǵa jetkizý tıimdi degenge mańyz berýimiz kerek.