Qazirgi ýaqytta adamdardan qaıyrym ketip barady, qatygezdenip kettik degendi jıi aıtatyn boldyq. Biraq, júrekteri izgilik pen meıirimdilikke toly jandardy kórgende, bul sózimizdiń jansaq aıtylǵanyn moıyndaýǵa týra keledi. Jaqsy adamdar janymyzda kóp eken. Ony Almaty qalalyq qoǵamdyq densaýlyq saqtaý basqarmasyna qarasty sharýashylyq júrgizý quqyndaǵy «Qalalyq qan ortalyǵy» komýnaldyq memlekettik mekemesiniń qurmetti donorlaryn, olarǵa degen turǵyndardyń qurmetin kórgende anyq kóz jetkizdik.
Qan arqyly adamǵa ómir syılaýdyń úlken adamgershilik pen azamattyq, izgilikti de qaıyrymdy is ekenin bilgen adamdar óz erikterimen donor bolýǵa kelisim berip, tipti ony ózderiniń ómirlik qaǵıdalaryna aınaldyryp kele jatqandary qanshama?! Al ondaı adamdar Almaty qalasynda da jeterlik. 2005 jyldan beri atalyp kele jatqan bul kúndi Almaty qalalyq qan ortalyǵy da nazardan tys qaldyrmaı, qaıyrymdy is atqaryp júrgen turaqty donorlaryna qurmet kórsetip keledi.
Bıyl da ortalyq basshylyǵy qurmetti donorlarynyń basyn qosyp, qan arqyly adamdarǵa ómir syılap júrgen abzal azamattarǵa raqmetterin aıtyp, qanǵa muqtaj jandardyń atynan alǵystaryn jetkizdi.
Donorlardy qurmetteýge arnalǵan saltanatty jıynǵa Almaty qalasy ákiminiń orynbasary Ásem Bekqyzy Núsipova, «Amanat» partıasynyń Almaty qalasy boıynsha fılıalynyń tóraǵasy Meıirjan Otynshıev, máslıhat depýtattary S.Konkýrov, A.Qodasbaev, qalalyq qoǵamdyq densaýlyq saqtaý basqarmasy basshysynyń orynbasary Nazgúl Imanǵalıeva qatysyp, donorlarǵa degen ystyq iltıpattaryn bildirip, olardy qalalyq Qan ortalyǵynyń Alǵys haty jáne baǵaly syılyqtarymen, ortalyq arnaıy shyǵarǵan «Men donormyn!» tósbelgisimen marapattady.
Almaty jurtynyń qurmetine bólengen qurmetti donorlardyń qatarynda V.Pýgachev, M. Shanjos, E.Dágılev, E.Stýpko, E. Ábenov, A. Juma, T.Hýdaev, N.Abaı, M.Borovıkov, I.Amanbaı sekildi turaqty qan donorlary bar. Donorlardy quttyqtaǵan Almaty qalasy ákiminiń orynbasary Ásem Bekqyzy Núsipova:
- Sizder biz úshin óte qymbat jansyzdar. Qan tapsyrý arqyly qanshama adamǵa, onyń ishinde sábıler men ómirge perzent ákelip jatqan analarǵa, qanǵa muqtaj naýqas jandarǵa ómir súrý baqytyn syılap júrsizder, sol erlikterińizge bas ıemiz, qadirli bizdiń donorlar. «Rahmet saǵan donor!» degen adamdardyń júrekjardy alǵysy sizderge degen qurmettiń úlkeni, aman bolyńyzdar, qatarlaryńyz kóbeısin, - dep óziniń aqjarma tilegin joldady.
Jıyn sońynda qala ákiminiń orynbasary, máslıhat depýtattary Qan ortalyǵyn aralap kórip, ortalyqtyń kúndelikti atqaratyn jumystarymen tanysty. «Amanat» partıasynyń tórǵasy Meıirjan Otynshıev bastaǵan máslıhat depýtattary men fılıal qyzmetkerleri qan tapsyryp, 14 maýsym - Donorlar kúnine oraı «Amanat» partıasynyń Naýryzbaı aýdandyq fılıaly bastaǵan qalalyq «Meıirimdilik - qanymyzda!» aksıasyna óz qoldaýlaryn bildirdi. «Meıirimdilik qanymyzda» qalalyq aksıasy qalamyzdaǵy «Amanat» partıasynyń barlyq fılıaldary men bastaýysh uıymdarynda 16 maýsymǵa deıin jalǵaspaq. Bul bastamaǵa siz de úles qosa alasyz.
«Qan tapsyryp, ómirge súrýge úmit syılańyz!