Qasıetti Ramazan aıy keldi.
Qazaqstan musylmandary dinı basqarmasy sharıǵat jáne pátýa bóliminiń mamany Elbek Tasbolatulynan orazany buzatyn jáne buzbaıtyn jaǵdaılar týraly saýaldarǵa jaýap alyndy, dep habarlaıdy aqshamnews.kz.
- Túkirigin jutý
Oraza kezinde adam túkirigin de, silekeıin de juta alady, orazaǵa kedergisi joq.
- Tis juldyrý
Eger qajettilik bolsa, tisti juldyrý kerek. Biraq, múmkindiginshe aýyzasharǵa qaldyrǵar abzal, óıtkeni tis juldyrǵanda nemese emdetkende kóbine syrttan ártúrli zattar nemese sý jutyp qoıý qaýpi joǵary. Eger jutynyp qoısa, bir kúndik qazany óteıdi.
- Dýshqa jáne baseınge túsý
Oraza kezinde dýshqa túsýge bolady, biraq dýshtyń býlanyp ketýinen saq bolǵan jón. Baseınge baspen súńgimeı shomylýǵa bolady, óıtkeni sý astyna súńgý unamsyz is sanalady.
- Massajǵa barý
Deneniń syrtqy jaǵy bolǵandyqtan, denege maı jaǵýdyń orazaǵa kedergisi joq. Massaj jasata berýge bolady. Al massaj jasaıtyn mamandar ózderi qatty álsirep, orazada qınalyp qalmaıtyndaı, múmkindiginshe aýyr jumys istemegeni abzal. Jalpy bul jumystyń orazaǵa kelip keteri joq.
- Plasıkalyq ota
Plasıkalyq hırýrgıa orazaǵa tikeleı qatysty emes. Eger plasıkalyq ota kezinde aýyrsynýdy basatyn dári ekse, orazaǵa kedergisi joq. Mundaı ýkol orazany buzbaıdy.
- Kalán shegý jáne temeki tútinin jutý
Kalánǵa Ramazan aıynda ǵana emes, jaı kúnderi de tyıym salynady. Al oraza kezinde tipti bolmaıdy, óıtkeni tútindi ádeıi jutý – orazany buzatyndardyń qatarynda. Temeki tartý nemese shylym shekken adamnyń qasynda ádeıi turý, sol arqyly tútindi jutý orazany buzady. Eger kóshede temeki tartqan adamnyń janynan ótkende eriksiz temeki tútinin jutyp qoısańyz, bul jaǵdaıda orazańyz buzylmaıdy.
- Qyz ben jigittiń áleýmettik jelide hat jazysýy
Orazaǵa tikeleı qatysy joq. Sharıǵatta úılený nıetinde jazyp jatyr ma, joq pa soǵan qaraıdy. Eger úılený nıetinde bolmaı, kúná istep jatsa, ol oraza aıynda bolsyn, basqa kúnderi bolsyn kúná bolyp esepteledi.
- Balaǵat sózder aıtý
Adam orazanyń saýabyn saqtaý úshin jaman sózderden aýlaq bolýy kerek. Qasıetti aıda ádeıi boqtaý orazany buzbasa da, onyń saýabyn kemitedi dep esepteımiz. Baıqaýsyzda boqtaý – bul da jaman ádet.
- Uıatty vıdeo, fılm kórý
Uıatsyz fılm kórý – jalpy tyıym salynǵan amal. Kúná sanalady, orazada adamnyń saýabyn kemitedi, tipti saýapsyz qalýy múmkin. Sondyqtan oraza kezinde mundaı áreketterden tyıylý kerek. Orazanyń bir maqsaty – adamdy óz-ózin tárbıeleýge sebepker bolatyn amal-qulshylyq jasaý.
- Makıaj jáne manıkúr jasatý
Orazaǵa tikeleı qatysy joq. Sebebi mundaı nárseler dáretke kedergi bolsa da, orazaǵa kedergi bolmaıdy.
- Qyzmet barysynda nemese otbasylyq jaǵdaıda ashýlaný, daýlasý, sózge kelý
Bular orazany buzbaıdy, biraq saýapty azaıtady.
- Bankten kredıt alý
Bankten nesıe alýǵa jalpy ruqsat etilmegen, al orazada saýabyn azaıtýǵa sebep bolyp qalady. Sondyqtan Ramazan aıynda boıymyzdy kúnádan barynsha aýlaq ustap, orazadan keıin de sony jalǵastyrýǵa tyrysqan jón.