Bul - óńirdegi eń irgeli ári jalǵyz keshen.
Elbasynyń 100 dene shynyqtyrý-saýyqtyrý keshenin salý týraly tapsyrmasyna sáıkes, jáne el Táýelsizdiginiń 30 jyldyǵyna oraı shekaralyq aımaq Raıymbek aýdanynda zamanaýı sport kesheni ashyldy. Nysandy salýǵa jáne materıaldyq-tehnıkalyq bazasyn qalyptastyrýǵa oblystyq búdjetten 1,3 mlrd. teńge bólindi, dep habarlaıdy Almaty-akshamy.kz Almaty oblysy ákiminiń resmı saıtyna silteme jasap.
Narynqol aýylynda salynǵan bul dene shynyqtyrý-saýyqtyrý kesheni – eldi mekendegi eń irgeli sporttyq nysan. Keshende sporttyq oıyn túrlerine, kúres, boks, ústel tenısine arnalǵan zaldar jáne trenajerlyq zal bar.
Sonymen qatar kıim sheshetin bólme, býfet, garderob, keń asqana, medısınalyq jáne massaj kabınetteri, demalys bólmesi, ákimshilik kabınetteri, májilis zaly da qarastyrylǵan. Kórermen trıbýnasy 180 orynǵa arnalǵan. Aýlada voleıbol alańy, ashyq fýtbol alańy bar, munda jazdy kúnderi sportshylar taza aýada jattyǵady. Balalardy tájirıbeli sportshylar jattyqtyrady. Respýblıkalyq jáne halyqaralyq jarystarda oblystyń namysyn qorǵaǵan, sonyń ishinde Raıymbek aýdanynan shyqqan ataqty chempıondardyń qatysýymen sheberlik saǵattaryn ótkizý josparlanǵan.
Ǵımarattyń jalpy alańy 4,8 myń sharshy metr, mańaıyna beınebaqylaý ornatylǵan.
Qurylystyń bas merdiger mekemesi «Fýd MS»JSHS boldy. Avtorlyq jáne tehnıkalyq qadaǵalaýdy «Sartóbe» JSHS men «Geodezıa Servıs» JSHS mamandary júrgizdi. Qurylys jumystaryna barlyq satyda tapsyrys berýshi retinde oblystyq dene shynyqtyrý jáne sport basqarmasy baqylaý jasady.