Rahymjan Otarbaevtyń ómiri men shyǵarmashylyǵyna arnalǵan bıblıografıalyq eńbek jaryq kórdi

Ulttyq kitaphanada kórnekti qazaq jazýshysy, qazaq ıntellektýaldy prozasynyń iri ókili, dramatýrg, memleket jáne qoǵam qaıratkeri Rahymjan Otarbaevtyń ómiri men shyǵarmashylyǵyna arnalǵan bıblıografıalyq kórsetkishtiń tusaýkeseri ótti, dep habarlaıdy Almaty-akshamy.kz.
⠀
Bıblıografıalyq kórsetkish QR Ulttyq kitaphanasy men «Rahymjan Otarbaev Rýhanıat qory» jeke qorymen birlesip shyǵaryldy.
⠀
İs-sharany Qazaqstannyń eńbek sińirgen qaıratkeri, Atyraý oblysy Inder aýdanynyń qurmetti azamaty, Almaty qalasy «Eńbegi úshin» medaliniń ıegeri Berǵalıev Amantaı júrgizdi.
⠀
Sharany QR Ulttyq kitaphanasy dırektorynyń aqparattyq tehnologıalar jáne ınovasıalar jónindegi orynbasary Iskalıeva Nýrıa Amanǵalıqyzy quttyqtaý sózben ashty.
⠀
Ulttyq bıblıografıa qyzmetiniń bıblıografy Nurymbaeva Jadyra slaıd arqyly bıblıografıalyq kórsetkishpen tanystyrdy. Kórsetkishtegi materıaldar 1977 jyldan 2022 jyldyń qarasha aıyna deıingi kezeńdegi jazýshynyń kitaptary, áńgimeleri, povesteri, óleńderi, pesalary, aýdarmalary, ádebı syn-zertteýleri, maqalalary, baıandamalary, suhbattary, qatysýymen shyqqan basylymdary jáne ómiri men shyǵarmashylyǵy týraly jazylǵan eńbekterdi qamtıdy.
⠀
Raqymjan Otarbaevtyń uly Ermereı Raqymjanuly Ulttyq kitaphana qoryna jazýshynyń «Bas» romanyn syıǵa tartyp, ujymǵa jáne kelgen qonaqtarǵa alǵysyn bildirdi.
⠀
Shara aıasynda T. Júrgenov atyndaǵy Qazaq Ulttyq óner Akademıasynyń stýdenti Hamıdýlla Sherhan Sádiqoja Mashanulynyń «Saǵynsań, qalqam, óziń kel» atty ánin oryndady.
⠀
Sondaı-aq, QR Ulttyq kitaphanasynyń qorynan Raqymjan Otarbaevtyń ómiri men shyǵarmashylyǵyna arnalǵan «Jalǵyz atty jolaýshymyn» atty kitap kórmesi uıymdastyryldy jáne jazýshynyń otbasy usynǵan qysqasha derekti beınejazba kórsetildi.