Buryn egin jınalyp, dándi óńdegennen keıin myńdaǵan tonna kúrish qaýyzy paıdalanylmaı, órteletin.
Ǵalymdardyń arqasynda kúrish qaýyzy men sabanynan qaǵaz, belsendirilgen kómir jáne bıochar ázirlenip jatyr, dep habarlaıdy Almaty-akshamy.kz
QR BǴM-niń aqparatyna sáıkes, Qorqyt ata atyndaǵy Qyzylorda ýnıversıtetiniń ǵalymdary kúrish qaýyzynan bıochar, kremnıı dıoksıdin alý tehnologıasyn jasady.
Bıochar álemde topyraq qasıetin jaqsartyp, onyń tuzdylyǵyn aıtarlyqtaı tómendetetin bıotyńaıtqysh retinde keńinen qoldanylady.
«Kremnıı dıoksıdi shyny, keramıka, abrazıv, betondy jabdyqtar, tis pastasy, kosmetıka, optotalshyq jáne t.b. óndirisinde qoldanylady. Ádette kremnıı dıoksıdin qumnan alady, biz kúrish qaýyzynan, ıaǵnı qaldyqtan alý tehnologıasyn jasadyq. Kúrish qaýyzyn maıdalap, keptirip, mıkrotolqyndyq sáýlelendirý jaǵdaıynda tuz qyshqylymen óńdeımiz. Osylaısha beıorganıkalyq qospalardy bólip alý úderisin jyldamdatyp, kúrish qaýyzyn mýfeldi peshte satylap 300 ºS-dan 800 ºS-ǵa deıin kúıdiremiz. Nátıjesinde tazalyǵy 100 % kremnıı dıoksıdi alynady», – dedi Qorqyt ata atyndaǵy Qyzylorda ýnıversıtetiniń profesory N.O.Appazov.
Ǵalymdar óńirde jetip artylatyn kúrish qaýyzyn qoldanýdyń basqa da rasıonaldy joldaryn izdestirip jatyr.